Zaj Nyeem Ib
Es Xes Kias 2:2-5
Cov lus nyob hauv Ntawv Es Xes Kias
Nws hais rau kuv, ib nthwv pa ntsawv tuaj hauv kuv, nws ua kuv sawv saum kuv ob txhais taw, kuv hnov tus hais rau kuv, Nws hais rau kuv : “Neeg leej tub, kuv xa koj mus rau His Xais Lais cov tub ki mus rau cov teb chaws cav ncauj, lawv cav kuv, lawv cov txiv cav kuv txog ntua hnub no, Kuv xa koj mus rau lawv, koj hais tias HUAB TAIS TSWV NTUJ hais li no : Cov tub ntsej muag tawv thiab siab qig lus, Saib lawv yuav mloog los lawv yuav kwv hlo vim lawv yog ib tse neeg cam thawj, lawv yuav paub tias ib tug saub nyob nruab nrab hauv lawv.”
Yog TSWV NTUJ lo Lus
Nkauj Paj Nruag Txais Ntuj Lus
NPN 123:1-2a,2bc,3-4(2cd)
Txais: Peb tsa muag ntsia HUAB TAIS, thov nws khuv leej peb.
(Nqua Suab Cav Txog Tswv Ntuj, 118)
1. Kuv tsa muag ntsia txog koj
uas yog tus zaum lub theej kiab nyob txheej ntuj saud,
zoo puav tam li cov tub txib ntsia lawv tus tswv txhais tes. Teb.
2. Peb ntsia ntsoov txog hnub uas peb tus HUAB TAIS TSWV NTUJ yuav pab peb,
zoo puav tam li tus txhais txib ntsia nws tus niam tsev txhais tes. Teb.
3. HUAB TAIS, thov koj hlub, thov koj khuv leej peb mas !
Vim luag thuam peb, dhuav peb siab tas nrho.
Peb tus plig ntim tsis taus cov neeg muab hlob tej tus thuam. Teb.
Zaj Nyeem Ob
2 Kos Lis Nthos 12:7-10
Cov lus nyob hauv Kos Lis Nthos Tsab Ntawv Ob
Kwv tij sawv daws, ntuj qhib tej yam zoo tas nrho los qhia kuv, tiam sis Ntuj tsis xav kom kuv muab hlob, ces Ntuj tso ib tug saus los chob kuv cov nqaij. Ntuj tso Xas Tas ib tug dab tuaj ntaus kuv tej tawg ncuav, kom kuv tsis txhob muab hlob. Kuv thov HUAB TAIS peb zaug, kom Xas Tas tus dab ntawd txav mus deb kuv. Tiam sis HUAB TAIS teb rau kuv tias : ‘Kuv lub txiaj ntsim txaus pab koj lawm, vim lub hwj huam muaj zog nyob hauv tus tsis muaj zog.’ Yog vim qhov ntawd, mas kuv thiaj khav txog kuv txoj kev tsis muaj zog, kom Leej Pleev lub hwj huam los nyob hauv kuv. Yog tim qhov ntawd mas kuv thiaj zoo siab txais kuv txoj kev raug luag thuam, kev txhawj xeeb, kev raug luag hiam, thiab tej kev ntshai, vim Leej Pleev. Vim tias, yog thaum kuv tsis muaj zog, mas kuv thiaj muaj zog.
Yog TSWV NTUJ lo Lus
Nkauj Cav Txog Lub Moo Zoo
His Xais 61:1
As les lus yas. As les lus yas. HUAB TAIS lub tswv yim nyob saum kuv, nws pleev roj qee kuv. Nws xa kuv mus tshaj lub Moo Zoo rau cov pluag txom nyem. As les lus yas.
(Nqua Suab Cav Txog Tswv Ntuj, 234, nqe 1)
Ntawv Moo Zoo
Mas Kos 6:1-6
Cov lus nyob hauv Mas Kos Ntawv Moo Zoo
YES XUS tawm hauv qhov chaw ntawd mus, nws rov mus lub zos nws nyob hlob, cov thwj tim kuj nrog nws mus thiab. Hnub Xas Npas Tos, YES XUS qhia hauv tsev txoos. Muaj neeg coob tuaj mloog, lawv hnov nws cov lus, lawv qhuas, lawv hais tias : "Nws tau tej ntawd qhov twg los ? Lub siab thoob tsib thiab cov hwj huam yees ntxwv loj uas nws ob txhais tes ua, yog leej twg pub rau nws? Tus ntawd tsis yog tus kws ntoo, Mab Liab tus tub lod ? Nws tsis yog Yas Kos, Yos Xes, Yus Das thiab Xis Moos lawv kwv tij lod ? Hos nws cov muam, tsis yog cov nrog peb nyob ua ke lod ? YES XUS ua lawv poob siab. Ces YES XUS hais rau lawv tias : "Ib tug Yaj Saub, tsuas yog nyob hauv lub zos nws hlob, hauv nws cov txheeb ze thiab nws tsev neeg, mas luag thiaj saib nws tsis muaj nqis." Vim li ntawd, YES XUS ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag ceg los tuag tes kom zoo. Nws xav tsis thoob txog qhov lawv tsis ntseeg.
HUAB TAIS PLEEV
