Zaj Nyeem Ib
As Mos 7:12-15
Cov lus nyob hauv Ntawv As Mos
Leej choj As Mas Xias hais rau yaj saub As Mos tias : cia li khiav ntawm no coj koj tej lus mus, khiav mus lawm Yus Das teb. Koj thiaj yuav ua saub koob koj ncauj nyob nrad. Tseg txhob ua saub nyob ntawm Npe Thes ntawm no. Yog vaj ntxwv lub chaw ntshiab, vaj ntxwv lub tsev txoos. As Mos teb rau As Mas Xias tias : kuv cav tsis yog saub, tsis yog noob saub yug, kuv nrhiav noj cog ntoo. Kuv tsuas saib tsiaj lawv tsiaj qab, tiam sis HUAB TAIS xaiv raug kuv, nws yog tus hais rau kuv : mus, koj mus ua saub rau kuv haiv His Xais Lais.
Yog TSWV NTUJ lo Lus
Nkauj Paj Nruag Txais Ntuj Lus
NPN 85:9ab-10,11-12,13-14(8)
Txais: HUAB TAIS, thov cia peb pom koj lub siab zoo ! thov pub koj txoj kev cawm neeg rau peb !
(Nqua Suab Cav Txog Tswv Ntuj, 119)
1. Kuv mloog saib TSWV NTUJ hais dab tsi.
HUAB TAIS hais rau nws haiv neeg tias, “Nej nyob kaj lug !”
HUAB TAIS txoj kev cawm los nyob ze cov neeg hwm nws.
Nws lub koob meej nqes los nyob hauv peb lub teb chaws. Teb.
2. Txoj kev cawm thiab kev tseeb los sib cuag.
Kev thaj yeeb thiab kev haum pheej los sib koom.
Txoj kev tseeb hlav ib tug txoov kaus nyob hauv ntiaj teb, kev haum pheej nqes saum ntuj los. Teb.
3. HUAB TAIS pub txiaj ntsim, peb cov av pub qoob loo.
Kev haum pheej mus ua HUAB TAIS ntej,
nws npaj txoj kev thaj yeeb rau peb taug. Teb.
Zaj Nyeem Ob
Es Fes Xos 1:3-14
Cov lus Paj Lug sau tuaj rau Cov Ntseeg nyob Es Fes Xos
Kwv tij sawv daws, kuv cav lus zoo txog TSWV NTUJ, peb tus HUAB TAIS YES XUS PLEEV Leej Txiv, vim nws foom hmoov zoo rau peb, thiab pub txiaj ntsim yug peb tus ntsuj plig, nws tau pub txhij pub txhua, nyob saum cov txheej ntuj, hauv Leej Pleev.
Thaum tseem tsis tau tsim lub ntuj lub teb, TSWV NTUJ twb xaiv peb nyob hauv Leej Pleev, kom peb ntshiab huv, tsis lo txhaum rau ntawm nws xub ntiag, thiab kom peb tau los nyob hauv txoj kev nyiam.
Nws ib txwm xaiv peb ua nws cov tub ki tshiab, nyob hauv YES XUS PLEEV. Nws lub tswv yim pom zoo ua li ntawd, kom peb cav txog nws lub hwj chim thiab nws lub txiaj ntsim, vim nws pub txiaj ntsim dawb rau peb nyob hauv tus Zoo Nyiam.
Nyob hauv Tus Zoo Nyiam, peb tau txais kev txhiv peb ntawm nws cov roj ntsha. Peb tau kev daws peb cov txhaum ntawm lub txiaj ntsim nplua nuj uas Leej Txiv pub dawb rau peb. Leej Txiv lub tswv yim thoob tsib thiab ntse qhia yam zais puag hauv nws lub siab xav rau peb paub, thiab qhia nws tus nru lus xav ua zoo uas nws ib txwm npaj rau peb paub.
Thaum txog lub caij teem, nws ua kom zaj nru lus zoo no tsheej xeeb : nws yuav coj txhua tsav txhua yam thiab coj txhua leej txhua tus nyob saum ntuj thiab nyob ntiaj teb rov los zwm rau Leej Pleev.
Ntuj xaiv peb thiab qee peb nyob hauv Leej Pleev, raws li TSWV NTUJ tus txheej txheem uas nws ib txwm tsa los coj txhua tsav txhua yam kom haum nws lub siab xav.
Ntuj qee peb los ua pab neeg xub tso siab rau Leej Pleev, thiab xub cav txog TSWV NTUJ lub koob meej. Nyob hauv Leej Pleev, nej hnov Lo Lus tseeb, uas yog lub Moo Zoo cawm nej, ces nej ntseeg lub Moo Zoo. LEEJ NTUJ PLIG NTSHIAB uas Ntuj cog lus pub, thiaj muab ib lub thwj ntaus cim rau nej. LEEJ NTUJ PLIG NTSHIAB yog thawj feem hauv lub cuab tam uas peb yuav txais. Nws npaj txoj kev txhiv txhua haiv neeg uas TSWV NTUJ muas los ua nws tug thiab los cav txog TSWV NTUJ lub koob meej.
Yog TSWV NTUJ lo Lus
Nkauj Cav Txog Lub Moo Zoo
Es Fes Xos 1:17-18
As les lus yas. As les lus yas. Thov kom peb tus HUAB TAIS YES XUS Leej Txiv tso qhov pom kev tuaj kaj peb siab kom peb tso siab lug taug txoj kev uas Ntuj hu peb vim Ntuj muaj hwj huam loj. As les lus yas.
(Nqua Suab Cav Txog Tswv Ntuj, 230, nqe 3)
Ntawv Moo Zoo
Mas Kos 6:7-13
Cov lus nyob hauv Mas Kos Ntawv Moo Zoo
Nws hu Pab Kaum Ob los cuag nws, ces nws xa lawv ua tej pab ob leeg mus. Nws pub hwj huam ntiab dab tsis huv rau lawv. YES XUS qhia lawv kom txhob nqa dab tsi taug kev li, tsuas nqa tib rab pas nrig xwb. Txhob ntim mov, txhob nqa hnab ruas, txhob ntim xim nyiaj rau hauv duav siv. Nws hais tias : "Nej rau khau khiab xwb, txhob hnav ob lub tsho." YES XUS tseem hais rau lawv tias : "Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab. Yog qhov chaw twg tsis txais nej, thiab luag tsis mloog nej, nej tso qhov chaw ntawd tseg, nej nchos cov plua av lo nej qab xib taws pov tseg, cia ua tim khawv txiav txim rau lawv." Cov thwj tim tawm mus, lawv tshaj kom tsoom sid tig los hloov siab tshiab. Lawv ntiab ntau tus dab phem, thiab lawv muab roj pleev ntau leej tuag tes tuag taw, thiab kho ntau tus neeg mob zoo.
HUAB TAIS PLEEV
