Zaj Nyeem Ib
Hauj Lwm 1:1-11
Yes Xus rov mus nyob saum ntuj. Tab sis nws xa nws lub tswv yim los nyob hauv peb : yog Leej Ntuj Plig Ntshiab.
Phau ntawv Hauj Lwm chiv li no
1 Tes Os Fis Los, nyob hauv kuv thawj phau ntawv, kuv twb sau txog tas ib puas tsav yam uas Yes Xus tau ua thiab tau qhia txij lub hauv paus los,
2 mus txog hnub uas Ntuj nqa nws mus saum ntuj. Thaum nws yuav mus, Leej Ntuj Plig Ntshiab tshoj kom nws xub qhia cov Hauv Paus Xa Lus uas nws tau xaiv.
3 Thaum nws raug luag tsim txom tas, nws yees tawm los xyuas cov Hauv Paus Xa Lus. Nws ua ntau yam zeem tseeb tias nws muaj txoj sia, nws tawm los rau lawv pom plaub caug hnub, nws tham txog Tswv Ntuj lub Ceeb Tsheej rau lawv.
4 Thaum Yes Xus nrog lawv nyob, nws hais rau lawv kom tsis txhob tawm hauv Yes Lus Xas Les mus, kom lawv nyob tos Leej Txiv lo lus cog tseg : "Lo lus uas nej hnov kuv hais tias :
5 Zam ua kab ke ntxuav nyob hauv dej. Hos nej, mas tshuav hnub puav xwb, nej yuav txais kab ke ntxuav nyob hauv Leej Ntuj Plig Ntshiab."
6 Thaum cov Hauv Paus Xa Lus nyob ua ke, lawv nug Yes Xus tias : "Huab Tais, nyem no puas yog lub sij hawm koj yuav rov tsa tus vaj His Xas Lais ?"
7 Yes Xus hais rau lawv tias : "Tsis yog nej hauj lwm yuav paub txog lub zim txwv thiab lub sij hawm uas Leej Txiv siv nws lub hwj huam los teem cia.
8 Tab sis, Leej Ntuj Plig Ntshiab yuav nqes los saum nej, ces nej yuav txais hwj huam, nej yuav ua kuv cov tim khawv nyob Yes Lus Xas Les, nyob thoob lub xeev Yus Das, thiab Xas Mas Lias, mus txog puag tim npoo ntiaj teb."
9 Yes Xus hais cov lus no tas, nws nce zuj zus ntawm lawv qhov muag. Muaj ib tw huab los thaiv ces lawv tsis pom nws lawm.
10 Thaum Yes Xus nce mus saum ub lawm, mas lawv nyob ntsia ntsoov lub ntuj, ces muaj ob tug neeg hnav tsoos dawb los cuag lawv.
11 Nkawd hais tias : "Cov Nkas Lis Lais, vim li cas nej nyob ntsia ntsoov lub ntuj zoo li no ? Tus Yes Xus uas Ntuj nqa nws hauv nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab."
Yog Tswv Ntuj lo Lus
Nkauj Paj Nruag Txais Ntuj Lus
NPN 47:2-3,6-7,8-9(6)
(Nqua Suab Cav Txog Tswv Ntuj, 164)
Txais: Tswv Ntuj tsa Nws lub theej kiab nyob hauv kev hom khaj, suab puab suab hom nrov nroo ntws cav txog Huab Tais.
1. Tas ib tsoom haiv neeg,
nej npuaj teg ntaug taw zoo siab cav txog Tswv Ntuj.
Tus Huab Tais Nyob Siab yog tus muaj hwj chim tas nrho,
yog tus vaj kav lub ntuj lub teb. Teb.
2. Tswv Ntuj tsa nws lub theej kiab nyob hauv kev hom khaj.
Huab Tais nyob nruab nrab hauv cov suab hom.
Nej hu nkauj cav txog Tswv Ntuj !
Nej hu nkauj rau peb tus vaj ! Teb.
3. Tus vaj kav tas ntiaj teb yog Tswv Ntuj, nej hu nkauj cav txog nws.
Tswv Ntuj zaum saum lub theej kiab ntshiab ua vaj kav txhua haiv neeg. Teb.
Zaj Nyeem Ob
Es Fes Xos 1:17-23
Peb pom Tswv Ntuj lub zog, vim nws tsa Yes Xus sawv rov los, thiab tsa Yes Xus ua tus loj tshaj tas puas tsav yam nyob saum ntuj.
Cov lus nyob hauv leej ntshiab Paj Lug tsab ntawv sau tuaj rau cov ntseeg nyob Es Fes Xos
17 Kwv tij sawv daws, kuv thov kom peb tus Huab Tais Yes Xus Pleev tus Tswv Ntuj, Leej Txiv muaj koob meej, pub ib lub tswv yim thoob tsib, thiab ib lub tswv yim txawj mem tau tej yam uas Ntuj qhib tawm los, nej thiaj yuav paub Tswv Ntuj tiag.
18 Kuv thov Tswv Ntuj tso qhov pom kev ci tuaj rau hauv nej lub siab, kom nej pom tias txoj kev tso siab uas Ntuj hu nej los nyob hauv, zoo npaum li cas, kom nej pom tias lub cuab tam nto koob meej nplua nuj npaum li cas nyob hauv cov ntshiab.
19 Nej tseem yuav pom Tswv Ntuj lub hwj huam uas peb ntsuas tsis tau. Nej thiaj yuav pom tias lub hwj huam no pab peb cov ntseeg heev npaum li cas, vim nws lub zog muaj peev xwm loj.
20 Tswv Ntuj nthuav nws lub zog nyob hauv Leej Pleev : nws tsa Leej Pleev sawv hauv cov tuag los, nws kom Leej Pleev zaum ntawm nws sab xis, nyob saum cov txheej ntuj,
21 nyob siab dua cov Tshiab ua vaj, siab dua cov Tshiab muaj hwj huam, siab dua cov Tshiab muaj zog, siab dua cov Tshiab ua huab tais, siab dua txhua leej nto npe, hauv lub zim txwv no mus dhau txhiab tiam yav tom ntej.
22 Tswv Ntuj tso tas puas tsav yam rau hauv Leej Pleev qab xib taws. Tswv Ntuj tsa Leej Pleev ua lub Koom Txoos tus Hau siab dua txhua leej :
23 lub Koom Txoos yog nws lub Cev. Leej Pleev lub Cev Hlob Tiav, nws nyob puv hauv txhua leej txhua tus, nws nyob puv lub sim ceeb.
Yog Tswv Ntuj lo Lus
Hoặc :
Hes Nplaws 9:24-28. 10:19-23
Cov lus nyob hauv tsab ntawv sau tuaj rau cov ntseeg nyob Hes Nplaws
24 Kwv tij sawv daws, Leej Pleev chaws mus hauv ib lub tsev Ntshiab uas tsis yog neeg txhais tes txhim, thiab tsis yog ib lub tsev ua piv txwv txog lub saum ntuj : Leej Pleev mus saum ntuj lawm tiag. Leej Pleev thiaj tawm los nyob ntawm Tswv Ntuj xub ntiag, nws cev lus pab peb.
25 Tsis tas Leej Pleev yuav rov cev nws rau Tswv Ntuj ob peb zaug, xws li tus tuam leej choj uas niaj xyoo nws yuav tsum rov mus cev ib co ntshav uas tsis yog nws cov ntshav nyob hauv Kem Ntshiab.
26 Yog Leej Pleev tsuas ua leej choj xws li lwm cov leej choj xwb, mas txij ntuj tsim teb raug los nws yuav tsum raug txom nyem ntau zaus. Tab sis thaum txog lub zwj ceeb kawg, nws tawm los ib zaug xwb, nws los ua nws thaj txi Ntuj rhuav kev txhaum pov tseg.
27 Leej tib neeg tsuas tuag ib zaug xwb, dhau qhov tuag lawm, yog lub caij txiav txim.
28 Leej Pleev rov muab nws txi Ntuj ib zaug xwb, kom nws tau ris ib zeej tsoom cov txhaum. Nws yuav tawm rov los zaum ob : zaum ntawd, nws yuav tsis ris kev txhaum, nws yuav tawm los rau cov neeg tos nws, nws yuav cawm lawv.
1019 Kwv tij, peb tso siab lug tias peb muaj ib txog kev mus txog hauv lub tsev Ntshiab, vim Yes Xus cov ntshav.
20 Yes Xus rhawv txoj kev tshiab, yog txoj kev muaj txoj sia rau peb taug : nws siv nws lub cev nqaij mus rhawv txoj kev ntawd.
21 Ces peb muaj ib tug Leej Choj loj tas nrho saib Tswv Ntuj lub tsev.
22 Ua li mas peb kav tsij nqa ib lub siab ncaj thiab ib lub siab ntseeg ruaj txav mus ze Tswv Ntuj, nqa ib lub siab huv tsis tsuas kev phem, coj ib lub cev ntxuav hauv dej ntshiab mus.
23 Peb kav tsij tso siab lug lees khov kho, vim tus tau cog lus rau peb, nws pheej xeeb.
Yog Tswv Ntuj lo Lus
Nkauj Cav Txog Lub Moo Zoo
Mas Tais 28:19a.20b
(Nqua Suab Cav Txog Tswv Ntuj, 233, nqe 4)
As les lus yas. As les lus yas. Huab Tais hais tias : "Nej mus qhia ib tsoom neeg kom ntseeg txog kuv. Ntawm kuv mas, kuv niaj hnub nrog nej nyob mus txog hnub lub ntiaj teb kawg." As les lus yas.
Ntawv Moo Zoo
Lus Kas 24:46-53
Yes Xus yuav rov mus lawm saum ntuj, nws hais rau cov thwj tim tias lawv yuav txais ib lub zog pab lawv tshaj txoj kev cawm neeg rau tas ntiaj teb.
Huab Tais Yes Xus Lub Moo Zoo raws leej ntshiab Lus Kas xaus li no
46 Muaj ib zaug, Yes Xus tawm los rau Nws cov thwj tim pom. Nws hais tias : "Ntawv sau hais tias Leej Pleev yuav raug luag tsim txom. Hnub peb, nws yuav sawv hauv cov tuag rov los.
47 Thiab Ntawv tseem hais tias yuav tsum tshaj txoj kev tig los hloov siab ntxub kev txhaum kom Ntuj zam txhaum rau ib tsoom haiv neeg nyob hauv Leej Pleev lub Npe. Yuav xub tshaj nyob Yes Lus Xas Les.
48 Nej yuav ua tim khawv txog tej ntawd.
49 Kuv yuav xa qhov uas kuv Txiv cog lus tuaj rau nej. Ua li mas nej nyob hauv lub nroog no mus txog hnub nej tau txais lub zog nqes saum txheej siab los hnav tso."
50 Yes Xus coj lawv mus txog Npes Tas Nias, ces nws tsa tes foom hmoov zoo rau lawv.
Yog Huab Tais Yes Xus Lub Moo Zoo
