Thứ Hai, 24 tháng 4, 2023

Zaj nyeem - Hnub Chiv 4 Caij Hla Xyoo A


Zaj Nyeem Ib
Hauj Lwm 2:14a.36-41
Tswv Ntuj tau tsa Yes Xus ua Huab Tais Pleev, hos peb sawv daws muab Yes Xus tua saum ntoo cuam. Peb yuav muab siab rau tig los yuav lub siab tshiab.

Cov lus nyob hauv Ntawv Hauj Lwm
14a Pob Zeb nrog Pab Kaum Ib leeg sawv ntsug,
nws hais cov lus no nrov nrov tias :
36 "Tsoom His Xas Lais,
nej yuav paub meej tias :
Tswv Ntuj tsa tus Yes Xus uas nej tau dai saum ntoo cuam,
ua Huab Tais thiab ua Leej Pleev."
37 Cov lus ntawd raug sawv daws lub siab.
Ces lawv hais rau Pob Zeb
thiab rau cov Hauv Paus Xa Lus tias :
"Kwv tij,
peb yuav ua dab tsi ?"
38 Pob Zeb teb rau lawv tias :
Nej yuav thov txhaum,
thiab nej txhia leej txhia tus yuav txais lub cim ntxuav nyob hauv Yes Xus Pleev lub npe kom Ntuj zam txhaum rau nej.
Ces nej yuav txais Leej Ntuj Plig Ntshiab cov paj tshab.
39 Vim thaum Ntuj cog lus,
mas yog nws cog lus yuav muab rau nej,
thiab rau nej cov me nyuam,
rau cov neeg nyob deb,
thiab rau tsoom neeg coob coob uas Huab Tais peb tus Tswv Ntuj yuav hu lawv los."
40 Pob Zeb tseem hais ntau lo lus qhuab qhia
thiab ntuas lawv.
Nws hais tias :
"Nej khiav kom nej dim ntawm tiam neeg xib rau kev phem no."
41 Cov neeg ntawd mloog Pob Zeb cov lus,
lawv txais lub cim ntxuav.
Hnub ntawd,
muaj ze ntawm peb txhiab leej los ntxiv cov thwj tim.
Yog Tswv Ntuj lo Lus

Nkauj Paj Nruag Txais Ntuj Lus
NPN 23:1-3a,3b-4,5-6(1)
(Nqua Suab Cav Txog Tswv Ntuj, 31)


Txais : Huab Tais yog tus Zoo Tswv Zov Yaj,
nws zov kuv,
kuv tsis ntshaw dab tsi li !


1. Huab Tais yog kuv tus tswv zov yaj,
kuv tsis ntshaw dab tsi.
Nws tso kuv nyob hauv tej tshav zaub mos.
Nws coj kuv mus so nyob ze dej,
nws rov ntxiv zog rau kuv tus plig. Teb.

2. Nws coj kuv mus taug txoj kev ncaj kom nws lub npe nto koob meej.
Tab yog kuv taug kev mus hauv lub kwj ha tsaus ntuj nti,
kuv tsis ntshai vim koj nrog kuv,
koj rab pas nrig yog kuv chaw tso siab. Teb.

3. Cov neeg ntxub kuv,
lawv hnyos kuv;
koj npaj ib roog qav rau ntawm kuv xub ntiag.
Koj pleev roj tsw qab rau saum kuv taub hau.
Koj hliv cawv puv lub ntim rau kuv haus. Teb.

4. Tas kuv sim neej,
kev kaj siab
thiab kev hlub nrog nraim kuv.
Tas kuv sim neej,
kuv yuav nyob hauv Huab Tais tsev. Teb.

Zaj Nyeem Ob
1 Pob Zeb 2:20b-25
Thaum peb ua cov hauj lwm zoo, yog peb raug luag hiam mas peb tau ib txog hmoov xws li Yes Xus txoj, ces peb thiaj nrog nws cawm lub ntiaj teb.

Cov lus nyob hauv Pob Zeb Thawj Tsab Ntawv
Kwv tij sawv daws,
20b Thaum yus ua zoo rau luag,
tab sis yus tseem raug luag hiam thiab,
mas qhov ntawd yog ib lub txiaj ntsim nyob ntawm Tswv Ntuj xub ntiag.
21 Ntuj hu nej kom nej ua li ntawd,
vim Leej Pleev kuj tau raug txom nyem los pab nej :
nws ua piv txwv rau nej taug.
22 Nws tsis tau ua txhaum li.
Tsis muaj ib lo lus nkhaus tawm hauv nws lub ncauj los.
23 Luag cem nws,
los nws tsis cem luag ;
nws raug txom nyem,
los nws tsis ua rau luag ntshai li.
Nws tso siab rau tus txiav txim raws txoj kev ncaj.
24 Nyob saum ntoo cuam,
nws ris peb cov txhaum,
kom peb lub siab nyiam ua txhaum tuag,
ces peb thiaj muaj txoj sia nyob hauv txoj kev ncaj.
Nws cov qhov txhab kho peb zoo hlo.
25 Yav thaud,
nej yog ib co yaj poob zoo,
nyem no,
nej tig rov los cuag tus tswv zov yaj uas zov nej txoj sia.
Yog Tswv Ntuj lo Lus

Nkauj Cav Txog Lub Moo Zoo
Zam 10:14,27
(Nqua Suab Cav Txog Tswv Ntuj, 242)

As les lus yas. As les lus yas.
Kuv cov yaj mloog kuv lub suab.
Kuv paub kuv cov yaj,
kuv cov yaj paub kuv.
Lawv raws li nraim kuv tus duab mus.
As les lus yas.
Kuv cov yaj mloog kuv lo lus.
Kuv paub kuv cov yaj,
kuv cov yaj paub kuv.
Lawv raws li nraim kuv mus.
As les lus yas.

Ntawv Moo Zoo
Zam 10:1-10
Yes Xus yog tus tswv pub txoj sia rau nws cov yaj. Cov neeg coj lub Koom Txoos lawv ua raws li Yes Xus tus piv txwv, cov ntseeg thiaj mloog lawv.

Nej mloog ib zag nyob hauv Zam Ntawv Moo Zoo
1 "Kuv hais qhov muaj tseeb tiag rau nej :
Tus tsis nkag ntawm qhov rooj mus hauv lub nkuaj yaj,
hos nws nce lwm qhov chaw mus rau hauv,
mas nws yog ib tug tub sab tuaj nyiag thiab tuaj lwg.
2 Tus uas nkag ntawm qhov rooj mus yog ib tug tswv zov yaj.
3 Tus zov rooj loog qhib qhov rooj rau nws,
cov yaj mloog nws lub suab.
Nws hu nws cov yaj,
nws tuav lawv ib leeg zuj zus lub npe,
nws coj lawv mus.
4 Thaum nws coj cov yaj tawm tas lawm,
nws mus ua ntej,
cov yaj lawv nws qab,
vim lawv paub nws lub suab.
5 Cov yaj yuav tsis mus raws lwm tus,
lawv yuav khiav ntawm lwm tus,
vim lawv tsis paub luag tej lub suab."
6 Yes Xus hais zaj paj lug no rau lawv,
tab sis lawv tsis paub tias nws hais txog dab tsi rau lawv.
7 Yes Xus rov qab hais tias :
"Kuv hais qhov muaj tseeb tiag rau nej tias kuv yog cov yaj lub qhov rooj.
8 Tas cov uas tuaj ua kuv ntej yog ib co tub sab tuaj nyiag
thiab tuaj lwg,
tab sis cov yaj kuj tsis mloog lawv.
9 Kuv yog lub qhov rooj :
tus twg nkag ntawm kuv mus,
nws yuav txais kev cawm,
nws yuav nkag tau rau hauv
thiab tawm tau los,
nws yuav nrhiav tau lub tshav zaub.
10 Tus tub sab tsuas tuaj nyiag,
tuaj lwg,
thiab tuaj txo txoj sia xwb.
Hos kuv,
mas kuv tuaj ua kom lawv tau txoj sia,
thiab kom lawv tau txoj sia loj zuj zus.
Yog Huab Tais Yes Xus Lub Moo Zoo

Zaj nyeem - Hnub Chiv 4 Caij Hla Xyoo A
  • Title : Zaj nyeem - Hnub Chiv 4 Caij Hla Xyoo A
  • Posted by :
  • Date : 14:37
  • Labels :
Top