Zaj Nyeem Ib
Hauj Lwm 8:5-8.14-17
Ib txwm, cov Koom Txoos ntseeg txog Yes Xus sib fim ntau, lawv sib pab sib qhia Yes Xus cov lus kom tas. Cov tsis xav fim luag tej, ntshai lawv txais kev ntseeg tsis tas.
Cov lus nyob hauv Ntawv Hauj Lwm
5 Lub caij ntawd,
mas Fis Lis Pos thiaj li mus rau nram ib lub nroog nyob Xas Mas Lias teb.
Nws tshaj lus txog Yes Xus nyob ntawd.
6 Tas tsoom sid koom siab koom ntsws npuab cov lus uas Fis Lis Pos hais,
vim sawv daws hnov txog cov cim uas Fis Lis Pos ua thiab pom nws ua.
7 Vim tias cov neeg raug dab phem coob leej rov zoo los :
cov dab phem ntawd tawm hauv cov neeg mus,
dab qw tej suab nrov nrov.
Cov tuag ceg thiab cov ceg tawv coob leej kuj cia li zoo hlo.
8 Nyob hauv lub nroog ntawd,
mas sawv daws zoo siab tas nrho.
14 Cov Hauv Paus Xa Lus nyob Yes Lus Xas Les,
lawv hnov tias Xas Mas Lias teb txais Tswv Ntuj lo lus lawm,
mas lawv xa Pob Zeb thiab Zam nkawd mus Xas Mas Lias teb.
15 Nkawd nqes mus nram cov Xas Mas Lias,
ces nkawd thov Ntuj rau lawv kom Ntuj pub Leej Ntuj Plig rau lawv.
16 Vim tias Leej Ntuj Plig tseem tsis tau poob los rau saum leej twg li.
Lawv tsuas kawg tau txais lub cim ntxuav nyob hauv Huab Tais Yes Xus lub npe xwb.
17 Pob Zeb thiab Zam nkawd tsa tes rau saum lawv,
ces lawv thiaj tau txais Leej Ntuj Plig Ntshiab.
Yog Tswv Ntuj lo Lus
Nkauj Paj Nruag Txais Ntuj Lus
NPN 66:1-3,4-5,6-7,16,20(1)
Txais: Tas lub ntiaj teb hu nkauj ntsuag qees cav txog Tswv Ntuj.
(Nqua Suab Cav Txog Tswv Ntuj, 33)
1. Tas lub ntiaj teb,
nej qw suab zoo siab cav txog Tswv Ntuj.
Nej hu nkauj cav txog nws lub npe muaj koob meej !
Nej seev lus paj huam cav txog nws.
Nej hais rau Tswv Ntuj hais tias,
“Koj tej hauj lwm muaj hwj xyeej tas nrho ! Teb.
2. Tas lub ntiaj teb txhos caug peb koj,
ntiaj teb neeg hu nkauj cav txog koj lub npe.”
Nej tuaj,
nej yuav pom Tswv Ntuj cov hauj lwm.
Nws lub hwj huam yuav kav txheej dhau txheej. Teb.
3. Nws uakom dej ntuj hloov ua av qhuav.
Lawv hla dej,
dej tsis ntub lawv taw.
Peb nqaum paj nqaum nruas cav txog Tswv Ntuj.
Nws lub hwj huam yuav kav txheej dhau txheej. Teb.
4. Tas ib tsoom neeg hwm Ntuj,
nej mloog mas !
Nej thiaj yuav paub qhov uas Tswv Ntuj ua rau kuv.
Nws tsis xyeeb kuv cov lus thov.
Nws tsis tshem nws txoj kev hlub mus deb kuv. Teb.
Zaj Nyeem Ob
1 Pob Zeb 3:15-18
Cov neeg ntseeg ntau zaus lawv raug luag thuam, mas cov neeg ntseeg yuav tsum ua zoo mus li rau luag. Luag ua phem rau yus, yus tsis ua phem rau luag.
Cov lus nyob hauv Pob Zeb Thawj Tsab Ntawv
Kwv tij sawv daws,
15 nej yuav hwm Huab Tais Pleev nyob hauv nej nruab siab.
Thaum luag nug nej saib yog vim li cas nej tso siab rau Ntuj,
mas nej yuav npaj kom nej txawj teb mus li.
16 Nej yuav teb mos nyoos rau luag,
thiab yuav hwm luag.
Nej ua li ntawd kom cov neeg hais lus xaiv txog nej,
pom nej tus cwj pwm zoo nyob hauv Leej Pleev,
ces lawv yuav poob ntsej muag.
17 Yog Tswv Ntuj pom zoo cia yus raug txom nyem vim yus ua ncaj,
mas qhov ntawd zoo dua yus raug txom nyem vim yus ua phem.
18 Leej Pleev tuag ib zaug,
vim peb cov txhaum.
Nws yog tus siab ncaj uas tuag mus cawm cov neeg tsis ncaj,
vim nws xav coj peb rov los rau Tswv Ntuj.
Luag tua nws lub cev nqaij tuag lawm,
tab sis nws rov muaj txoj sia nyob hauv lub tswv yim.
Yog Tswv Ntuj lo Lus
Hoặc : 1 Pob Zeb 4:13-16
Yog nej raug luag hiam, vim txoj kev ncaj, mas nej txoj hmoov zoo.
Cov lus nyob hauv Pob Zeb Thawj Tsab Ntawv
Kwv tij sawv daws,
13 nej nrog Leej Pleev raug txom nyem npaum li cas,
nej yuav zoo siab npaum li ntawd thiab,
ces thaum nws lub hwj chim yuav tawm los rau pom xyeem,
mas nej yuav tau nyob hauv txoj kev kaj siab lug,
nej yuav lom zem.
14 Yog nej raug luag tsawm,
vim Leej Pleev lub npe,
mas nej txoj hmoov zoo,
vim Leej Ntuj Plig muaj hwj chim,
uas yog Tswv Ntuj Leej Tswv Yim tuaj roos nej.
15 Nej yuav tsis txhob muaj ib tug uas nws raug tsim txom vim nws tua neeg,
los nws ua tub sab,
los ua phem rau luag,
los nws mus kom luag.
16 Hos yog nej ib tug raug tsim txom vim nws yog ib tug Pleev,
mas nws tsis txhob txaj muag :
nws yuav cav txog Tswv Ntuj,
vim Tswv Ntuj pub lub npe ‘Pleev’ rau nws.
Yog Tswv Ntuj lo Lus
Nkauj Cav Txog Lub Moo Zoo
Zam 14:23
(Nqua Suab Cav Txog Tswv Ntuj, 238, nqe 8)
As les lus yas. As les lus yas.
Huab Tais hais tias,
“Leej twg nyiam kuv,
nws yuav coj kuv cov lus.
Kuv Txiv yuav nyiam nws,
kuv Txiv wb yuav nyob hauvnws.”
As les lus yas.
Ntawv Moo Zoo
Zam 14:15-21
Yes Xus nyob ze peb mus li, thiab nws xa Leej Ntuj Plig tuaj ua tus nplij tus pov hwm peb. Li ntawd, nyob hauv txoj kev txhawj xeeb peb muaj Yes Xus thiab muaj Leej Ntuj Plig nres peb.
Nej mloog ib zag nyob hauv Zam Ntawv Moo Zoo
Muaj ib zaug, Yes Xus hais rau nws cov thwj tim tias :
15 "Yog nej nyiam kuv,
mas nej yuav coj rawv kuv cov lus qhia.
16 Kuv yuav thov Leej Txiv,
ces nws yuav xa dua ib leeg Nplij neeg los nrog nej nyob mus li.
17 Tus ntawd yog Leej Ntuj Plig qhia qhov tseeb.
Lub qab ntuj neeg txais tsis tau nws,
vim qab ntuj neeg tsis pom nws thiab tsis paub nws.
Hos nej,
mas nej paub nws,
vim nws tsa tsev nyob ze nej,
thiab nws yuav los nyob hauv nej."
18 "Kuv yuav tsis cia nej ua ntsuag.
Kuv los cuag nej.
19 Tshuav me ntsis ces lub qab ntuj neeg yuav tsis pom kuv ntxiv.
Tab sis nej yuav pom kuv,
vim kuv muaj txoj sia nyob,
nej kuj yuav muaj txoj sia nyob thiab.
20 Hnub ntawd,
nej yuav paub tias kuv nyob hauv kuv Txiv,
nej nyob hauv kuv,
thiab kuv nyob hauv nej.
21 Tus muaj kuv cov lus qhia,
thiab nws coj rawv kuv cov lus qhia,
nws thiaj yog tus nyiam kuv. Tus nyiam kuv,
mas kuv Txiv yuav nyiam nws,
kuv kuj yuav nyiam nws thiab,
kuv yuav muab kuv rau nws pom."
Yog Huab Tais Yes Xus Lub Moo Zoo
Hoặc : Zam 17:1-11a
Txiv, Koj ua kom koj Leej Tub muaj koob meej mas.
Nej mloog ib zag nyob hauv Zam Ntawv Moo Zoo
1 Yes Xus hais li ntawd tas,
nws tsa muag ntsia saum ntuj,
nws hais tias:
"Txiv, txog sij hawm lawm !
Koj ua kom koj Leej Tub muaj koob meej mas.
Ces koj Leej Tub yuav ua kom koj muaj koob meej,
2 vim koj muab hwj huam rau nws kav tas txhua leej txhua tus,
kom nws pub txoj sia nyob mus li rau txhua leej uas koj muab rau nws.
3 Txoj sia nyob mus li yog zoo li no :
kom lawv paub koj,
uas yog tus tseem Tswv Ntuj,
thiab paub Yes Xus Pleev uas yog tus koj xa tuaj.
4 Kuv ua kom koj muaj koob meej nyob ntiaj teb no,
vim tias cov hauj lwm uas koj muab rau kuv ua,
mas kuv ua tiav lawm.
5 Txiv,
nyem no koj ua kom kuv muaj koob meej nyob ntawm koj xub ntiag,
yog lub koob meej uas kuv muaj txawm rau ntawm koj xub ntiag thaum lub sim ceeb tsis tau xeeb los nyob.
6 "Cov neeg koj rho hauv lub qab ntuj los pub rau kuv,
mas kuv ua kom lawv pom xyeem koj lub Npe.
Cov neeg no yog koj tug,
koj muab lawv pub rau kuv,
ces lawv coj rawv koj lo lus.
7 Nyem no lawv paub tias tas txhua yam uas koj muab rau kuv yog tuaj ntawm koj tuaj.
8 Vim tias cov lus uas koj muab rau kuv,
mas kuv muab pub rau lawv lawm.
Lawv txais koj cov lus,
ces lawv paub tseeb tias kuv tuaj ntawm koj tuaj,
thiab lawv ntseeg tias yog koj xa kuv tuaj.
9 Kuv thov koj rau lawv.
Kuv tsis thov koj rau lub qab ntuj neeg,
kuv thov koj rau cov uas koj muab pub rau kuv,
vim lawv yog koj tug.
10 Txhua yam uas yog kuv tug,
kuj yog koj tug ;
txhua yam uas yog koj tug,
kuj yog kuv tug thiab.
Kuv muaj koob meej nyob hauv lawv.
11a Kuv tsis nyob hauv lub qab ntuj no ntxiv lawm,
tab sis lawv tseem nyob hauv lub qab ntuj no.
Hos kuv,
mas kuv los cuag Koj.
Yog Huab Tais Yes Xus Lub Moo Zoo
