Zaj nyeem HWM PEB LEEG HUAB TAIS xyoo A (Chúa Ba Ngôi A)

Zaj Nyeem Ib
Kev Tsiv 34:4b-6,8-9
Tswv Ntuj hais rau Mais Xes tias Tswv Ntuj yog ib tug Huab Tais hlub neeg, nws tsis yog ib tug tswv qhia txoj cai nruj nruj.
Cov lus nyob hauv Ntawv Kev Tsiv
Muaj ib zaug,
^4b Mais Xes sawv ntxov mus pem lub roob Xis Nais,
raws li Tswv Ntuj qhia rau nws.
Nws tuav ob daig txiag zeb.
⁵ Huab Tais nyob hauv ib twv huab nqes los,
Huab Tais los nrog Mais Xes sawv ua ke.
Mais Xes hu txog Huab Tais lub npe.
⁶ Huab Tais hla ntawm Mais Xes xub ntiag,
ces Mais Xes qw nrov nrov tias :
"Huab Tais, Huab Tais,
tus Tswv Ntuj uas lub siab hlub mos nyoos,
thiab khuv leej neeg,
tus npau taws qeeb,
tus pub paj tshab ntau,
tus tsis fav xeeb.
⁸ Thooj txhij ntawd,
Mais Xes txhos caug ntua pe hauv av pe.
⁹ Ces nws hais tias:
"Huab Tais,
yog koj saib kuv tsim nyog,
thov koj nrog nraim peb mus,
txawm tias peb yog ib haiv neeg xwb qwb txhav,
los thov koj zam peb qhov yuam kev thiab zam txhaum rau peb,
koj muab peb los ua koj tug."
Yog Tswv Ntuj lo Lus

Nkauj Paj Nruag Txais Ntuj Lus
Das Nias 3:52-53,54,55,56(52b)
(Nqua Suab Cav Txog Tswv Ntuj, 38)

Txais: Lub koob meej thiab lo lus cav yog koj yog mus tas ib txhiab ib txhis.

1. Huab Tais, peb cov yawg koob tus Tswv Ntuj,
Koj muaj koob meej nto moo,
Tsim nyog peb cav lus zoo txog koj tas ib txhiab ib txhis.
Koj lub npe ntshiab nto moo lug,
Tsim nyog peb cav lus zoo txog koj tas ib txhiab ib txhis. Teb.

2. Koj muaj koob meej nto moo lug hauv lub tuam tsev
Uas koj lub hwj chim ntshiab nyob,
Tsim nyog peb cav lus zoo txog koj lub koob meej tas ib txhiab ib txhis. Teb.

3. Koj muaj koob meej nto moo lug saum lub theej kiab
Uas nyob hauv koj lub teb chaw,
Tsim nyog peb cav lus zoo txog koj tas ib txhiab ib txhis. Teb.

Zaj Nyeem Ob
2 Kos Lis Nthos 13:11-13
Peb yuav niaj hnub nyob kaj siab lug nyob hauv peb leeg Huab Tais.
Cov lus Paj Lug sau tuaj rau cov ntseeg nyob Kos Lis Nthos tsab ntawv ob
¹¹ Kwv tij sawv daws,
qhov kawg no,
thov kom nej tau nyob kaj siab lug.
Nej yeej meem muab siab rau ua neeg zoo txhij zoo txhua.
Nej sib yaum ua siab loj.
Nej koom ua ib lub siab ib lub ntsws mog.
Nej coj nej lub neej nyob hauv txoj kev thaj yeeb.
Ces tus Tswv Ntuj pub kev nyiam thiab kev thaj yeeb yuav nrog nej nyob.
¹² Nej rov sib foom lus hmov tshua,
nej sib nwj nyob hauv txoj kev ntshiab.
Tas tsoom ntshiab foom lus hmov tshua rau nej.
¹³ Huab Tais Yes Xus Pleev lub txiaj ntsim,
Tswv Ntuj txoj kev nyiam,
thiab Leej Ntuj Plig Ntshiab txoj kev sib haum xeeb nrog nej sawv daws nyob.
Yog Tswv Ntuj lo Lus

Nkauj Cav Txog Lub Moo Zoo
Qhib Yav Tom Ntej 1:8
(Nqua Suab Cav Txog Tswv Ntuj, 237, nqe 5)
As les lus yas. As les lus yas.
Huab Tais Leej Txiv,
Huab Tais Leej Tub
thiab Huab Tais Leej Ntuj Plig muaj koob meej nto moo lug.
Yog tus Huab Tais ib txwm nyob thiab yog tus tseem yuav los.
As les lus yas.

Ntawv Moo Zoo
Zam 3:16-18
Peb tus Tswv Ntuj yog ib tug Tswv hlub lub ntiaj teb neeg, nws tso nws leej Tub tuaj pab lub ntiaj teb neeg.
Nej mloog ib zag nyob hauv Zam Ntawv Moo Zoo
¹⁶ Tswv Ntuj nyiam lub qab ntuj neeg npaum no :
nws thiaj muab nws Leej Tub twm zeej rau,
kom xwv tus ntseeg txog Leej Tub txhob tuag,
tab sis kom nws muaj txoj sia nyob mus li.
¹⁷ Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg,
nws xa Leej Tub tuaj cawm lub qab ntuj neeg.
¹⁸ Tus ntseeg txog Leej Tub,
nws tsis raug txiav txim.
Tus tsis ntseeg, nws twb raug txiav txim lawm,
vim nws tsis ntseeg txog Tswv Ntuj Leej Tub twm zeej lub npe.
Yog Huab Tais Yes Xus Lub Moo Zoo