Zaj Nyeem Hwm Yes Xus lub siab ntshiab, xyoo A (Lễ Thánh Tâm)

Zaj Nyeem Ib
Txoj Cai Ob 7:6-11
Huab Tais nyiam nej thiab xaiv nej.
Cov lus nyob hauv Ntawv Txoj Cai Ob
Mais Xes hais cov lus no rau cov His Xas Lais :
⁶ Koj yog ib haiv neeg qee rau Huab Tais koj tus Tswv Ntuj;
koj yog haiv neeg uas Huab Tais,
koj tus Tswv Ntuj tau xaiv hauv tas txhua haiv neeg nyob hauv ntiaj teb,
los ua nws haiv neeg.
⁷ Yog Huab Tais nyiam nej thiab xaiv nej,
tsis yog vim nej coob dua lwm haiv neeg,
rau qhov nej tseem yog ib haiv neeg tsawg dua cov.
⁸ Tab sis,
vim Huab Tais hlub nej,
thiab nws xav ua raws li lo lus uas nws tau cog rau nej cov yawg koob,
ces nws thiaj siv nws txhais tes muaj zog rho nej tawm ntawm lub teb chaws ua luag qhev los,
thiab npo nej ntawm Fas Las Oos,
uas yog tus vaj Hais Nkws Tos lub hwj huam.
⁹ Li no koj yuav tsum paub tias Huab Tais koj tus Tswv Ntuj yog tus tseem Tswv Ntuj tiag,
yog tus Tswv Ntuj tsis fav xeeb uas cog lus ruaj,
thiab hlub cov neeg nyiam nws,
thiab khaws nws cov lus qhia txheej dhau txheej.
¹⁰ Tab sis nws muab txim rau cov neeg ntxub nws.
Nws ua kom tus neeg ntxub nws tuag tam sid ntawd,
nws tsis ncua lub txim.
¹¹ Li ntawd,
koj yuav coj cov lus qhia,
cov kev cai lij choj uas kuv ceeb toom rau koj hnub no.
Yog Tswv Ntuj lo Lus

Nkauj Paj Nruag Txais Ntuj Lus
NPN 103:1-2,3-4,6-7,8,10(17)
(Nqua Suab Cav Txog Tswv Ntuj, 40)

Txais: Huab Tais lub siab hlub roos cov neeg hwm nws mus ib txhiab ib txhis.

1. Kuv tus plig, koj cav lus zoo txog Huab Tais.
Kuv tej siab ntsws, nej cav lus zoo txog nws lub npe ntshiab.
Kuv tus plig, koj cav lus zoo txog Huab Tais.
Koj txhob mom nws txheej.
Koj yuav nco ntsoov nws tej txiaj ntsim. Teb.

2. Nws zam koj cov txhaum, nws kho koj tej mob nkeeg.
Nws muab nws lub siab zoo thiab khuv leej neeg roos koj.
Nws cawm koj txoj sia ntawm kev puas tsuaj. Teb.

3. Huab Tais ua cov hauj lwm ncaj,
cov raug luag tsuj, nws tsa lawv cai.
Nws qhia nws tej kev rau Mais Xes,
nws qhia nws cov hauj lwm nto koob meej rau tsoom His Xas Lais. Teb.

4. Huab Tais siab zoo, nws khuv leej neeg tas nrho.
Nws hlub neeg mus li, nws tsis npau taws sai.
Nws tsis nplua peb raws li peb cov txhaum.
Nws tsis pauj kev phem rau tej txhaum peb tau ua. Teb.

Zaj Nyeem Ob
1 Zam 4:7-16
Tswv Ntuj tau nyiam peb.
Cov lus nyob hauv Zam Tsab ntawv Ib
⁷ Cov zoo nyiam,
peb yuav sib nyiam sib hlub mog !
Vim txoj kev nyiam tuaj ntawm Tswv Ntuj tuaj,
ua li mas tus twg nyiam,
tus ntawd yug ntawm Tswv Ntuj los,
thiab nws paub Tswv Ntuj.
⁸ Tus tsis txawj nyiam,
mas nws tsis paub Tswv Ntuj,
vim Tswv Ntuj yog txoj kev nyiam.
⁹ Tswv Ntuj txoj kev nyiam peb tawm los rau qhov muag pom xyeem li no :
Tswv Ntuj xa nws Leej Tub Twm Zeej tuaj nyob ntiaj teb no,
kom peb ciaj nyob hauv nws Leej Tub.
¹⁰ Nws txoj kev nyiam yog zoo li no :
tsis yog peb tau nyiam Tswv Ntuj,
yog Tswv Ntuj tau nyiam peb,
thiab yog nws xa nws Leej Tub tuaj ua nqi txhiv peb ntawm peb cov txhaum.
¹¹ Cov zoo nyiam,
yog Tswv Ntuj nyiam peb npaum li ntawd,
mas peb kuj yuav sib nyiam sib hlub thiab.
¹² Tsis muaj leej twg tau ntsia ntsoov Tswv Ntuj ib zaug li.
Yog peb sib nyiam sib hlub,
mas Tswv Ntuj nyob hauv peb,
thiab nws txoj kev nyiam uas zoo txhij zoo txhua hlob tiav nyob hauv peb.
¹³ Peb paub tias peb nyob hauv Tswv Ntuj,
thiab nws nyob hauv peb vim qhov no :
yog qhov nws pub nws Leej Ntuj Plig rau peb.
¹⁴ Ntawm peb,
mas peb tau ntsia ntsoov,
ces peb ua tim khawv zeem tias Leej Txiv tau xa Leej Tub tuaj cawm lub qab ntuj neeg.
¹⁵ Tus lees tias Yes Xus yog Tswv Ntuj Leej Tub,
mas Tswv Ntuj nyob txawm hauv nws,
thiab nws nyob hauv Tswv Ntuj.
¹⁶ Peb paub Tswv Ntuj txoj kev nyiam peb lawm,
ces peb ntseeg.
Tswv Ntuj yog txoj kev nyiam :
tus twg nyob hauv txoj kev nyiam,
mas nws kuj nyob hauv Tswv Ntuj,
thiab Tswv Ntuj nyob hauv nws.
Yog Tswv Ntuj lo Lus

Nkauj Cav Txog Lub Moo Zoo
Mas Tais 11:29ab
(Nqua Suab Cav Txog Tswv Ntuj, 218, nqe 2)

As les lus yas. As les lus yas.
Huab Tais hais tias,
‘Nej yuav txais Kuv tus quab.
Nej kawm ntawm kuv,
nej yuav khaws.
Kuv cov lus qhia vim Kuv lub siab zoo tsis muab hlob.’
As les lus yas.

Ntawv Moo Zoo
Mas Tais 11:25-30
Kuv siab zoo, kuv tsis muab hlob.
Nej mloog ib zag nyob hauv Mas Tais Ntawv Moo Zoo
²⁵ Lub caij ntawd,
Yes Xus hais tias :
"Txiv, Kuv cav lus zoo txog koj,
Huab Tais kav lub ntuj lub teb,
vim Koj zais tej yam ntawd rau cov neeg thoob tsib thiab cov neeg ntse,
Koj ho qhib rau cov me nyuam yaus.
²⁶ Muaj tseeb tiag, Txiv,
Koj lub siab nyiam li ntawd.
²⁷ Kuv Txiv muab tas ib puas tsav yam rau Kuv.
Tsis muaj leej twg paub Leej Tub,
tsuas kawg Leej Txiv thiaj paub.
Kuj tsis muaj leej twg paub Leej Txiv,
tsuas kawg Leej Tub thiaj paub,
thiab tus uas Leej Tub pom zoo qhia rau kom paub.
²⁸ "Tas nej sawv daws uas nej khwv,
thiab ris nra hnyav,
nej tuaj cuag Kuv mog !
Kuv yuav cia nej so los siav.
²⁹ Nej txais kuv tus quab.
Nej kawm ntawm Kuv mog,
vim Kuv siab zoo, Kuv tsis muab hlob,
nej tus plig yuav nrhiav tau chaw so los siav.
³⁰ Vim Kuv tus quab kwv yooj yim,
thiab kuv lub nra sib.
Yog Huab Tais Yes Xus Lub Moo Zoo