Zaj Nyeem Ib
His Xais 55:6-9
Peb ua txhaum ntau, tab sis Tswv Ntuj siab dav kawg. Peb tso siab tias Tswv Ntuj xav coj peb mus taug tej txoj kev zoo tas nrho.
Cov lus nyob hauv Ntawv His Xais
6 Nej nrhiav Huab Tais mog ! Nyem no yog lub caij zoo ntsib nws. Nws nyob ze lawm, nej hu txog nws mog !
7 Tus siab phem, nws yuav tso nws txoj kev phem tseg. Tus siab nkhaus tso nws lub tswv yim lim hiam tseg. Nws yuav tig los cuag Huab Tais. Huab Tais yuav khuv leej nws. Nws cia li los cuag Tswv Ntuj, vim Tswv Ntuj lub siab zam dav.
8 Nej zaj tswv yim tsis zoo li kuv zaj. Nej txoj kev tsis zoo li kuv txoj kev. Yog Huab Tais lus ceeb toom.
9 Lub ntuj nyob siab dua lub ntiaj teb, kuv txoj kev nyob siab dua nej txoj kev npaum li ntawd. Thiab kuv zaj tswv yim nyob siab dua nej zaj tswv yim.
Yog Tswv Ntuj lo Lus
Nkauj Paj Nruag Txais Ntuj Lus
NPN 145:2-3,8-9,17-18(18a)
(Nqua Suab Cav Txog Tswv Ntuj, 64)
Txais: Huab Tais nyob ze cov neeg hu txog nws.
1. Huab Tais, kuv yuav niaj hnub cav txog koj lub koob meej.
Kuv yuav cav lus zoo txog koj lub npe mus ib txhiab ib txhis.
Huab Tais loj tas nrho, tsim nyog cav txog nws.
Nws loj tas nrho, neeg ntsuas tsis tau. Teb.
2. Huab Tais siab zoo, nws khuv leej neeg, nws tsis npau taws sai.
Huab Tais ua zoo rau txhua leej txhua tus.
Nws hlub thiab txuag nws tej dej num. Teb.
3. Huab Tais ua yam twg, nws ua ncaj.
Nws lim xeeb rau txhua txoj hauj lwm raws txoj kev ntshiab.
Huab Tais nyob ze cov neeg tuav txog nws lub npe.
Nws nyob ze cov neeg muab tas nrho lawv lub siab lub ntsws hu txog nws. Teb.
Zaj Nyeem Ob
Fis Lis Pos 1:20c-24.27a
Peb txiav tsis tau tias peb yuav nyob ntev los tsis ntev nyob ntiaj teb no. Tab sis peb txiav tau tias lub caij peb nyob ntiaj teb no mas peb muab siab rau ua cov hauj lwm Tswv Ntuj npaj rau peb ua.
Cov lus Paj Lug sau tuaj rau Cov Ntseeg nyob Fis Lis Pos
Kwv tij sawv daws,
20c tab yog kuv ciaj los tuag, mas Leej Pleev yuav muaj hwj chim nyob hauv kuv lub cev.
21 Kuv saib Leej Pleev yog kuv txoj sia. Kuv saib txoj kev tuag yog ib yam paj tshab.
22 Tsis kav, yog kuv lub cev ua neej nyob ntxiv, nws tseem yuav ua ib yam hauj lwm txi txiv ; mas kuv tsis paub tias, kuv yuav xaiv txoj kev ua neej nyob ntxiv, los txoj kev tuag.
23 Kuv hnov ob lub siab ua xyem xyav muab kuv dua ua ob sab : ib lub siab xav mus nrog Leej Pleev nyob, qhov ntawd yog qhov kuv nyiam dua.
24 Tiam sis, yog kuv lub cev ua neej nyob ntxiv, mas yuav zoo dua rau nej.
27a Nej yuav coj ib lub neej kom tsim nyog Leej Pleev lub Moo Zoo.
Yog Tswv Ntuj lo Lus
Nkauj Cav Txog Lub Moo Zoo
Hauj Lwm 16:14b
(Nqua Suab Cav Txog Tswv Ntuj, 217, nqe 2)
As les lus yas. As les lus yas.
Huab Tais, thov koj qhib peb lub siab kom peb txawj mloog koj Leej Tub cov lus qhia. As les lus yas.
Ntawv Moo Zoo
Mas Tais 20:1-16a
Tswv Ntuj yuav pub lub Moo Zoo los pub lub txiaj ntsim rau leej twg kuj tau. Tsis muaj leej twg yuav muaj cai yws yws vim nws txais tsawg hos luag tej txais ntau.
Nej mloog ib zag nyob hauv Mas Tais Ntawv Moo Zoo
1 Muaj ib zaug, Yes Xus hais zaj paj lug no : vim tias Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv.
2 Nws nrog cov tub zog hais haum ib hnub ib lub txiaj nyiag, ces nws xa lawv mus tom daim teb txiv cawv.
3 Ze cuaj teev, nws tawm mus ncig, nws pom ib co neeg nyob dag tom tshav puam.
4 Nws hais rau lawv tias : “Nej mus ua num tom kuv daim teb txiv cawv, kuv yuav muab nqi kom haum nej.”
5 Ces lawv mus. Kwv yees tav su, nws rov tawm mus ncig, thaum hnub qaij peb teev nws rov mus ua li qub.
6 Thaum hnub qaij ze li tsib teev, nws rov tawm mus ncig dua, nws tseem pom ib co nyob dag, nws hais rau lawv tias : “Vim li cas nej nyob dag tas hnub ntawm no, tsis ua num dab tsi li ?”
7 Lawv hais rau nws tias : “Vim tsis muaj neeg ntiav peb.” Tus tswv hais tias : “Nej mus ua num tom kuv daim teb txiv cawv thiab mas.”
8 Thaum tsaus ntuj, tus tswv teb hais rau tus tswj nyiaj txiag tias : “Koj hu cov tub zog los, koj muab nyias tus nqe zog rau nyias. Koj xub hu cov tuaj tom qab zuj zus los xaus rau cov xub tuaj.”
9 Cov tub zog uas tuaj thaum tsib teev hnub qaij los txog, lawv ib leeg tau ib lub txiaj nyiag.
10 Cov xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab.
11 Thaum lawv txais lawv tus nqi, lawv yws rau tus tswv teb tias :
12 “Cov tuaj tom qab ua num ib teev xwb, koj muab rau lawv ib yam li muab rau peb, hos peb, mas peb kwv nra thiab tiv tshav ib hnub.”
13 Ces tus tswv teb hais rau cov xub tuaj ib tug tias : “Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ?
14 Txais koj tus nqi zog, koj cia li mus. Kuv xav muab rau tus tuaj tom qab no, ib yam li muab rau koj :
15 kuv tsis muaj cai rho kuv tej nyiaj txiag raws kuv siab lod ? Los yog koj khib vim kuv siab zoo ?"
16a Cov tuaj tom qab yuav tau ua ntej, hos cov ua ntej yuav tuaj tom qab zoo li no.
Yog Huab Tais Yes Xus Lub Moo Zoo
){kind=link}