Zaj Nyeem Ib
Txoj Cai Ob 18: 15-20
Yes Xus yog tus tseem Yaj Saub uas Tswv Ntuj xa tuaj qhia Tswv Ntuj cov lus rau lub ntiaj teb neeg. Peb yuav tsum txais Yes Xus cov lus.
Cov lus nyob hauv Ntawv Txoj Cai Ob
15 Muaj ib zaug, Mais Xes hais rau cov His Xas Lais tias : Koj tus Huab Tais Tswv Ntuj yuav tshoj ib tug neeg hauv nruab nrab nej, hauv koj tsoom kwv tij, kom nws sawv ua Yaj Saub zoo li kuv. Nej yuav mloog nws hais.
16 Qhov ntawd, yog qhov uas koj tau thov ntawm Huab Tais koj tus Tswv Ntuj thaum tsoom His Xas Lais ua lub txoos nyob saum roob Hos Les, koj hais tias : "Kuv tsis xav hnov Huab Tais, kuv tus Tswv Ntuj lub suab ntxiv, kuv tsis xav ntsia lub cub tawg loj loj ntawd ntxiv lawm, tsam kuv tuag."
17 Huab Tais thiaj hais rau kuv tias : "Lawv hais yog lawm.
18 Kuv yuav tsa ib tug Yaj Saub zoo li koj, hauv nruab nrab lawv tsoom kwv tij los. Kuv yuav muab kuv cov lus tso rau hauv nws lub ncauj, ces nws yuav hais tas puas tsav yam rau lawv raws li kuv qhia.
19 Yog leej twg tsis mloog kuv cov lus uas tus Yaj Saub hais, mas kuv yuav nug nws txog qhov ntawd.
20 Yog tus Yaj Saub twg muaj cuab kav tuav txog kuv lub npe hais tej lo lus kuv tsis tau qhia kom hais, los yog nws tuav txog lwm tus tswv ntuj lub npe los hais lus, mas tus Yaj Saub ntawd yuav tuag xwb.
Yog Tswv Ntuj Lo Lus
Nkauj Paj Nruag Txais Ntuj Lus
NPN 95:1-2, 6-7, 8-9 (8)
(Nqua Suab Cav Txog Tswv Ntuj, 108)
Txais: Hnub no yog nej hnov Huab Tais lub suab lawm, nej tsis txhob cia nej lub siab tawv li pob zeb.
1. Nej tuaj, peb sawv daws hu nkauj zoo siab cav txog Huab Tais !
Peb qw suab zoo siab hawm lub tsua cawm peb.
Peb txav los ntawm nws xub ntiag ua nws tsuag !
Peb npuaj teg hu nkauj cav txog nws. Teb.
2. Nej chaws los, peb khoov cev, peb pe.
Peb txhos caug hawm tus Huab Tais tsim peb los.
Nws yog peb tus Tswv Ntuj, peb yog nws haiv neeg,
yog pab yaj nws txhais tes hwj. Teb.
3. Hnub no, nej cia li mloog Huab Tais lub suab.
Nej tsis txhob cia nej lub siab tawv li pob zeb
zoo li thaum nej nyob Mes Lis Npas
thiab nyob Mas Xas hauv teb chaws suab puam.
Thaum ntawd, nej cov yawg koob twb pom kuv cov hauj lwm muaj hwj huam,
tsis kav lawv tseem twv kuv thiab sim kuv. Teb.
Zaj Nyeem Ob
1 Kos Lis Nthos 7: 32-35
Tas tsoom ntseeg yuav tsum paub tias Tswv Ntuj xaiv leej puav los ua neeg nyob tab seeb kom tau pab Tswv Ntuj haiv neeg zoo dua thiab leg Tswv Ntuj cov hauj lwm. Cov tsev neeg ntseeg yuav thov kom Tswv Ntuj hu leej puav nyob hauv lawv tsev los xaiv lub neej nyob tab seeb ua Tswv Ntuj cov hauj lwm.
Cov lus Paj Lug sau tuaj rau cov ntseeg nyob Kos Lis Nthos tsab ntawv ib
32 Kwv tij sawv daws, Kuv xav pom nej ua ib co neeg tsis muaj chaw ntxhov siab. Tus txiv neej uas nws tsis muaj poj niam, nws muab siab rau leg Huab Tais cov hauj lwm, nws nrhiav txoj kev ua xis Huab Tais siab.
33 Tus yuav poj niam lawm, nws muab siab rau leg ntiaj teb cov hauj lwm, nws nrhiav txoj kev ua xis nws poj niam siab. Ces nws lub siab fab rau ob tog huv tib si.
34 Tus poj niam tsis muaj txiv, xws li tus nkauj xwb, nws kuj muab siab rau leg Huab Tais cov hauj lwm, nws nrhiav txoj kev ua kom nws lub cev thiab nws lub tswv yim ntshiab tuaj. Hos tus yuav txiv lawm, nws muab siab rau leg ntiaj teb cov hauj lwm, nws nrhiav kev kom ua xis nws tus txiv lub siab.
35 Kuv hais qhov ntawd, vim yog ib yam zoo rau nej ; tsis yog kuv xav cuab ntxiab rau nej. Kuv xav coj nej mus cuag tej yam tsim nyog, tej yam khi nej rau Huab Tais tib leeg.
Yog Tswv Ntuj Lo Lus
Nkauj Cav Txog Lub Moo Zoo
Mas Tais 4:16
(Nqua Suab Cav Txog Tswv Ntuj, 234, nqe 3)
As les lus yas. As les lus yas. Haiv neeg uas nyob hauv kev tsaus ntuj pom Ntuj txoj kev kaj. Ib qho pom kev ci tuaj rau cov maub hauv tub tuaj teb. As les lus yas.
Ntawv Moo Zoo
Mas Kos 1:21-28
Yes Xus coj tus yam ntxwv ua Tswv Ntuj tus Tub Txib, tab sis nws cov lus muaj peev xwm.
Nej mloog ib zag nyob hauv Mas Kos Ntawv Moo Zoo
21 Yes Xus lawv mus hauv Kas Fas Naus. Hnub Xas Npas Tos, Yes Xus mus hauv lub tsev txoos, nws qhia sawv daws tam sim ntawd.
22 Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab.
23 Nyob hauv lawv lub tsev txoos, tam sim ntawd, muaj ib tug neeg raug ib tug dab tsis huv nthe nthe tias :
24 "Yes Xus Nas Xas Les, koj xav ua dab tsis rau wb ? Puas yog koj tuaj rhuav wb ? Kuv paub koj yog leej twg : koj yog Tswv Ntuj tus Ntshiab."
25 Yes Xus cem nws tias : "Ua twj ywm, koj cia li tawm hauv tus neeg no mus."
26 Dab tsis huv siv zog muab tus neeg ntawd co heev heev, nws nthe ib suab nrov nrov ces nws tawm hauv tus neeg mus.
27 Tas sawv daws ntshai, lawv sib nug zom zaws tias : qhov ntawd yog dab tsi ? Puas yog ib txog kev qhuab qhia tshiab muaj peev xwm ? Tab yog dab tsis huv, los nws tswj lawv, ces lawv mloog nws lus.
28 Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais.
Yog Huab Tais Yes Xus Lub Moo Zoo
