Zaj Nyeem Ib
His Xais 40:1-5,9-11
Huab Tais lub hwj chim yuav tawm los. Txhua tus muaj lub cev nqaij puav leej yuav pom lub hwj chim.
Cov lus nyob hauv ntawv yaj saub His Xais
1 Nej tus Tswv Ntuj hais tias : "Nej nplij kuv haiv neeg, nej nplij lawv mas !
2 Nej hais lus rau hauv Yes Lus Xas Les nruab siab. Nej hais nrov nrov rau nws tias nws lub caij ua qhev dhau lawm. Nws them txim txhaum tas lawm. Cov xwm uas nws txais ntawm Huab Tais txhais tes los them nws cov txhaum twb tshaj nws cov txhaum ob npaug lawm."
3 Muaj ib lub suab qw tias : "Nej npaj ib txog kev hauv teb chaws suab puam rau Tswv Ntuj taug. Nej ncaws ib txog kev ncaj hauv cov teb chaws quav poj rau peb tus Tswv Ntuj.
4 Nej txhub cov hav tob kom siab, kom cov roob thiab cov hauv toj cia li qis, kom cov tiaj muaj pov toj, hloov ua hav tiaj tus yees, kom cov toj ntxhab hloov ua tshav puam.
5 Huab Tais lub hwj chim yuav tawm los. Txhua tus muaj lub cev nqaij puav leej yuav pom lub hwj chim, vim Huab Tais lub ncauj tau hais lus.
9 Koj yog tus fi tsab xov zoo no mus rau Xis Yoos. Koj nce mus saum ib lub roob siab, koj tsa suab qw nrov nrov mas ! Koj yog tus fi tsab xov zoo mus rau Yes Lus Xas Les, koj txhob ntshai cuab suab. Koj hais rau cov nroog Yus Das tias : "Ntsia ntawm no saib, yog nej tus Tswv Ntuj."
10 Saib Huab Tais Tswv Ntuj nyob ntawm no. Nws tuaj txog, nws muaj hwj huam ! Nws txhais npab ua tswv kav sawv daws. Nej ntsia tus nqi zog nrog nws. Cov nyiaj nws them nyob ntawm nws xub ntiag.
11 Nws zoo li ib tug Tswv saib nws cov yaj nog zaub. Nws puag cov me nyuam yaj nyob hauv nws xub ntiag. Nws coj cov maum yaj rov mus so hauv nkuaj.
Yog Tswv Ntuj lo Lus
Txais Ntuj Lus
NPN 104:1b-2, 3-4, 24-25, 27-28, 29b-30 (1)
(Nqua Suab Cav Txog Tswv Ntuj, 148)
Txais: Kuv tus Plig, koj cav lus zoo txog Huab Tais.
1. Kuv tus Huab Tais Tswv Ntuj, koj lij tas nrho.
Koj hnav koob meej ci ntsa iab.
Koj hnav qhov pom kev li lub tsho tshaj sab muaj hwj chim.
Koj nthuav lub ntuj zoo li ib chaws ntaub. Teb.
2. Koj txhim koj lub tuam tsev rau saum cov dej nyob txheej ntuj saud.
Koj muab tauv huab los ua koj lub tsheb.
Koj mus kev saum cua ob phab tis.
Koj muab cua ua koj cov tub coj xo.
Koj muab nplaim taws ua koj tub txib. Teb.
3. Huab Tais, koj cov hauj lwm ntau tas nrho.
Koj tsim tas txhua yam raws kev thoob tsib.
Koj tsim txhua yam tsiaj nyob puv ntaij teb.
Koj tsim lub hiav txwv kom muaj tsiaj lij tsiaj me coob suav tsis txheeb. Teb.
4. Txhua leej txhua tus tos koj yuav pub txhiam xws rau lawv raws caij nyoog.
Koj pub rau lawv ces lawv cev tes txais.
Koj nthuav koj txhais tes ces lawv tau txhua yam zoo. Teb.
5. Yog koj rho txoj pa ntawm leej twg mas lawv txoj sia tu, lawv rov mus ua av luaj.
Thaum koj xa koj lub tswv yim tuaj mas lawv rov tsheej xeeb muaj txoj sia.
Koj ua kom lub ntiaj teb rov tshiab tuaj. Teb.
Hoặc : His Xais 42:1-4, 6-7
Yes Xus yog Tswv Ntuj tus Tub Txib. Tswv Ntuj nres nws, xaiv nws.
Cov lus nyob hauv ntawv yaj saub His Xais
1 Tswv Ntuj hais tias : Nej ntsia ! Kuv tus tub txib uas kuv nres, tus kuv xaiv, tus kuv nyiam tas siab. Kuv tau txawb kuv lub tswv yim los roos nws. Nws yuav piav Txoj Cai rau cov kuj cuab.
2 Kuv tus tub txib yuav tsis nthe, tsis hais nrov, tsis ua suab ncha nyob ntawm tej kev hauv nroog.
3 Nws yuav tsis lov tus txhiav qaug, nws lub siab pheej xeeb yuav piav Txoj Cai.
4 Kuv tus tub txib yuav tsis ntaus siab me, tsis qaug zog mus txog hnub nws tsa kev ncaj kav ntiaj teb. Cov pov txwv tos txog nws Txoj Cai.
6 Kuv yog Huab Tais, kuv tau hu koj los nyob hauv txoj kev ncaj, kuv tau tuav koj tes, kuv tau puab koj, kuv tau xaiv koj los ua kuv tus tub txib tsim haiv neeg cog lus, kuv tau xaiv koj los ua lub teeb pom kev kaj cov kuj cuab.
7 Kuv xaiv koj los ua tus qhib cov dig muag qhov muag, kuv tau xaiv koj los ua tus tso cov neeg kaw hauv tsev loj faj kom tawm los, rho cov neeg nyob hauv qhov taub kom tawm hauv kev tsaus ntuj nti los.
Yog Tswv Ntuj lo Lus
Txais Ntuj Lus
NPN 29:1-2, 3-4, 3b, 9b-10 (11b)
(Nqua Suab Cav Txog Tswv Ntuj, 10)
Txais: Huab Tais yuav foom hmoov zoo thiab pub kev thaj yeeb rau nws haiv neeg.
1. Nej uas yog Tswv Ntuj cov tub, nej tshaj Huab Tais lub koob meej.
Nej cav txog tus Huab Tais muaj hwj chim lub npe mog.
Nej txhos caug pe ntawm Huab Tais xub ntiag. Teb.
2. Huab Tais lub suab nrov dua suab dej thiab nrov dua cov dej nphau.
Huab Tais lub suab muaj hwj huam nrov qeeg nkaws. Teb.
3. Tus Tswv Ntuj muaj hwj chim ua xob quaj nroo ntws.
Nyob hauv nws lub tuam tsev,
txhua tsav txhua yam cav tias: “Koj muaj koob meej !”
Huab Tais zaum saum nws lub theej kiab nyob siab dua cov dej nyab ntiaj teb.
Nws zaum saum lub theej kiab ua vaj ib txhiab ib txhis. Teb.
Zaj Nyeem Ob
Tis Tos 2:11-14,3:4-7
Tswv Ntuj cawm peb nyob hauv cov dej ntxuav neeg, kom peb rov yug los tshiab, thiab rov tshiab tuaj nyob hauv Leej Ntuj Plig Ntshiab.
Cov lus nyob hauv leej ntshiab Paj Lug sau tuaj rau leej ntshiab Tis Tos
11 Kwv tij sawv daws, sawv daws yuav coj tus yam ntxwv zoo, vim Tswv Ntuj lub txiaj ntsim yog lub qhov dej uas txhawv txoj kev cawm txhua leej txhua tus. Tswv Ntuj lub txiaj ntsim tawm los rau sawv daws pom xyeem.
12 Tswv Ntuj lub txiaj ntsim qhia peb kom tso kev tsis hwm Ntuj pov tseg, tso txoj kev ntshaw txog lub sim ceeb no tseg, kom tiam neej no, peb ua neej nyob hauv txoj kev cheem peb lub siab, hauv txoj kev ncaj, thiab kev hwm Ntuj.
13 Vim peb tos thiab peb vam ntsoov txoj kev kaj siab lug. Peb tos kom peb tus Tswv Ntuj loj, Yes Xus Pleev uas yog tus cawm peb lub hwj chim tawm los rau qhov muag pom xyeem.
14 Yes Xus Pleev, nws muab nws rau luag ntes, kom nws txhiv tau peb ntawm txhua txoj kev phem. Nws ntxuav ib haiv neeg kom huv los ua nws tug, thiab kub siab ua cov dej num zoo.
34 Tab sis, hnub uas tus Tswv Ntuj cawm peb qhib nws lub siab zoo tawm los thiab nws txoj kev nyiam tsoom sid tawm los rau qhov muag pom xyeem,
5 mas nws tsis tshuaj tias peb puas tau ua cov dej num ncaj los tsis tau. Nws tsuas mloog nws lub siab khuv leej neeg. Nws cawm peb nyob hauv cov dej ntxuav neeg, kom peb rov yug los tshiab, thiab rov tshiab tuaj nyob hauv Leej Ntuj Plig Ntshiab.
6 Tswv Ntuj tso Leej Ntuj Plig los nyob puv hauv peb ntau kawg, nyob hauv Yes Xus Pleev, tus cawm peb.
7 Leej Pleev lub txiaj ntsim ua kom peb ntshiab tuaj, ces peb tso siab tau tias peb yuav txais txoj sia nyob mus li los ua peb lub cuab tam.
Yog Tswv Ntuj lo Lus
Hoặc : Hauj Lwm 10:34-38
Tswv Ntuj pleev Yes Xus, yam li nws pub Leej Tswv Yim lub hwj huam rau Yes Xus.
Cov lus nyob hauv ntawv Hauj Lwm
34 Muaj ib zaug, Pob Zeb hais tias : "Nyem no, kuv paub tseeb tias Tswv Ntuj tsis kws leej twg cai.
35 Nyob hauv tas txhua haiv neeg, yog leej twg hwm Ntuj thiab coj txoj kev ncaj, mas leej twg ntxim Tswv Ntuj siab.
36 Tswv Ntuj xa nws lo lus tuaj rau cov His Xas Lais. Nws xa lub Moo Zoo tias neeg yuav nyob thaj yeeb nyob hauv Yes Xus Pleev. Yes Xus Pleev yog sawv daws tus Huab Tais.
37 Nej twb tau hnov txog tej xwm uas tshwm sim tuaj nyob hauv xeev Yus Das : yam li thaum Zam tshaj tias sawv daws yuav txais lub cim ntxuav, mas nej kuj hnov hais txog Yes Xus nyob Nas Xas Les. Nws pib qhia hauv xeev Nkas Lis Lais.
38 Tswv Ntuj tau pleev nws. Tswv Ntuj muab Leej Ntuj Plig Ntshiab thiab muab hwj huam rau nws. Nws mus ncig teb ncig chaw, nws ua zoo rau sawv daws. Nws kho cov neeg poob hauv dab phem tes kom lawv zoo. Vim Tswv Ntuj nrog nws nyob.
Yog Tswv Ntuj lo Lus
Nkauj Cav Txog Lub Moo Zoo
Lus Kas 3:16
(Nqua Suab Cav Txog Tswv Ntuj, 227, nqe 3)
As les lus yas. As les lus yas. Zam hais tias : “Tus muaj zog dua kuv yuav tuaj. Nws yuav ntxuav nej nyob hauv Leej Ntuj Plig Ntshiab thiab ntxuav nyob hauv hluav taws.” As les lus yas.
Ntawv Moo Zoo
Lus Kas 3:15-16.21-22
Yes xus yog tus siab ntshiab, uas Tswv Ntuj nyiam kawg.
Nej mloog ib zag nyob hauv leej ntshiab Lus Kas ntawv Moo Zoo
15 Muaj ib zaug, Tsoom pej xeem vam vam tos ntsoov, sawv daws ua xyem xyav txog Zam rau nruab siab tias tej zaum Zam yog Leej Pleev.
16 Ces Zam hais rau sawv daws tias : "Ntawm kuv, mas kuv muab dej los ntxuav nej, tab sis tus muaj zog dua kuv yuav tuaj. Kuv tsis tsim nyog daws txoj hlua khi nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab hauv hluav taws.
21 Thaum uas tsoom pej xeem txais kab ke ntxuav tas, thiab Yes Xus kuj txais kab ke ntxuav tas lawm, ces Yes Xus teev Ntuj. Lub ntuj qhib plho los,
22 ces Leej Ntuj Plig Ntshiab yees ua ib lub cev, xws li ib tug nquab, nqes los saum Yes Xus. Ib lub suab nrov saum ntuj tuaj tias : "Koj yog kuv Leej Tub. Hnub no kuv xeeb koj."
Yog Huab Tais Yes Xus Lub Moo Zoo
){kind=link}