NRUAB HNUB (Lễ ngày)
Zaj Nyeem Ib
Hauj Lwm 2:1-11
Leej Tswv Yim Ntsiab yog zoo li cua : nws ua kom neeg lub siab muaj zog li cua hlob. Kuj yog zoo li hluav taws : nws ua kom neeg pom kev thiab kub siab.
Cov lus nyob hauv Ntawv Hauj Lwm
1 Thaum txog lub Hnub Nyoog Tsib Caug, tas cov thwj tim huv tib si tuaj sib txoos ua ke.
2 Ib sij huam, txawm muaj ib lub suab nrov saum ntuj tuaj xws li ib nthwv cua hlob hlob ntsawj, lub suab ntawd nrov thoob plaws lub tsev uas lawv nyob.
3 Ces lawv pom tej ntshua nplaim zoo li nplaim taws, ncau ua tej tus nplaim me ya tuaj tsaws saum cov thwj tim txhua tus.
4 Lawv sawv daws tau txais Leej Ntuj Plig Ntshiab puv hauv lawv, ces lawv pib hais ntau xeem lus raws li Leej Ntuj Plig pub kom lawv hais tau.
5 Thaum ntawd, muaj ib co Yus Das kub siab ntseeg tuaj ntawm tas cov teb chaws hauv lub qab ntuj khwb tuaj nyob Yes Lus Xas Les.
6 Thaum lawv hnov lub suab nrov, tas ib tsoom neeg tuaj ntsauv vij vog. Sawv daws ua siab poob nthav vim tias thaum cov thwj tim hais lus, mas lawv nyias hnov hais nyias xeem lus.
7 Lawv ceeb tas nrho, xav tsis thoob, ces lawv hais tias : "Tas cov neeg uas hais lus ntawd, lawv tsis yog ib co Nkas Lis Lais lod ?
8 Ua li cas peb thiaj nyias hnov lawv hais nyias xeem lus ?
9 Peb yog ib co neeg Pas Tos, Mes Dias, Es Las Mias, peb nyob Mes Xos Pos Tas Mias tuaj, Yus Das, Kas Pas Dos, Poos Tus, As Xias,
10 Fis Zias, Pas Fis Lias, nyob Hais Nkws Tos thiab Lis Npias teb chaws uas ze Xis Les Nas, peb yog neeg Los Mas tuaj nyob ntawm no.
11 Peb yog ib co Yus Das thiab ib co teev dab txais kev ntseeg, ib co Khes Tas, As Las Npias, peb puav leej hnov lawv hais peb xeem lus cav txog Tswv Ntuj lub hwj chim."
Yog Tswv Ntuj lo Lus
Nkauj Paj Nruag Txais Ntuj Lus
NPN 104:1,24,29-30,31,34(30)
(Nqua Suab Cav Txog Tswv Ntuj, 167)
Txais: Huab Tais, thov koj xa Leej Ntuj Plig Ntshiab nqes los ua kom lub ntiaj teb rov tshiab tuaj.
Hoặc (los yog) : As les lus yas.
1. Kuv tus plig, koj cav lus zoo txog Huab Tais !
Kuv tus Huab Tais Tswv Ntuj, koj loj tas nrho.
Huab Tais, koj cov hauj lwm ntau tas nrho.
Koj tsim txhua yam tsiaj nyob puv ntiaj teb. Teb.
2. Yog koj rho txoj pa ntawm leej twg mas lawv txoj sia tu,
lawv rov mus ua av luaj.
Thaum koj xa koj lub tswv yim tuaj mas lawv rov tsheej xeeb muaj txoj sia.
Koj ua kom lub ntiaj teb rov tshiab tuaj. Teb.
3. Thov kom Huab Tais lub koob meej nyob mus li,
kom Huab Tais zoo siab rau nws tej dej num,
kom kuv zaj paj huam ntxim nws siab !
Kuv yuav zoo siab nyob hauv Huab Tais. Teb.
Zaj Nyeem Ob
1 Kos Lis Nthos 12:3b-7.12-13
Leej Tswv Yim Ntshiab pab sawv daws kom nyias txawj ua nyias txoj hauj lwm nyob hauv lub Koom Txoos.
Cov lus nyob hauv leej ntshiab Paj Lug thawj tsab ntawv sau tuaj rau cov ntseeg nyob Kos Lis Nthos
3b Kwv tij sawv daws, yog ib tug neeg tsis muaj Leej Ntuj Plig qhia nws, mas nws hais tsis tau tias : ‘Yes Xus yog Huab Tais.’
4 Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb.
5 Muaj ntau txoj kab xwm, tab sis yog tuaj ntawm tib tug Huab Tais tuaj.
6 Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg.
7 Ntuj pub Leej Ntuj Plig rau peb kom peb pab tau tsoom sid.
12 Ib yam li neeg lub cev : neeg muaj tib lub cev xwb : tab sis muaj tes, muaj taw, muaj ntau yam : txhua yam yog lub cev, txawm tias muaj ntau ces, los yeej yog tib lub cev xwb. Nyob hauv Leej Pleev kuj zoo li ntawd.
13 Vim tias peb sawv daws tau txais lub Cim Ntxuav nyob hauv Leej Ntuj Plig tib leeg, thiab nyob hauv tib lub cev xwb. Tsis hais cov Yus Das los cov Hes Las, cov qhev los cov twj lij, peb sawv daws puav leej tau haus txaus siab ntawm Leej Ntuj Plig tib leeg.
Yog Tswv Ntuj lo Lus
Ca tiếp liên (Pentecost Sequence)
Leej Tswv Yim Ntshiab
( Txiv Plig Nyiaj Pov NSCTTN, 414 )
Leej Tswv Yim Ntshiab, Koj tuaj mas !
Ib txwm, Koj qhov pom kev ziab nyob txheej ntuj saud !
Koj tso qhov pom kev tuaj ziab txog peb.
Cov neeg ntxhov siab vam txog Koj tuaj nplij lawv.
Cov ntsuag nos tos Koj tuaj ua lawv luag.
Cov neeg nqhis qhuav siab qhawv saib Koj xws li lub qhov dej txhawv.
Peb ua neeg khwv tas sim neej, Koj yog peb qhov chaw so.
Peb ua neej tiv tshav tiv nag, Koj yog peb qhov chaw nkaum tshav nkaum nag.
Peb ua neej saub neej see, Koj yog peb qhov chaw tshav ntuj nrig.
Leej Ntuj Plig pub txoj kev kaj lug, Koj tuaj nyob hauv cov neeg vam txog Koj.
Koj yog cov pluag txiv faib txiaj ntsha txiaj ntsim rau lub qab ntuj neeg.
Los yog hu nkauj : download (TP. CV Chiv txais)
Nkauj Cav Txog Lub Moo Zoo
(Nqua Suab Cav Txog Tswv Ntuj, 218, nqe 1)
As les lus yas. As les lus yas.
Los mas ! Leej Ntuj Plig Ntshiab, koj los ua kom peb lub siab kub li hluav taws, cog txoj kev ntseeg kom ruaj nreb hauv peb mus ib txhis. As les lus yas.
Ntawv Moo Zoo
Zam 20:19-23
Leej Tswv Yim Ntshiab yog tus tuaj tshoj neeg lub siab kom paub tias yam twg zoo, yam twg txhaum.
Nej mloog ib zag nyob hauv leej ntshiab Zam Ntawv Moo Zoo
19 Thawj hnub pib lub lis piam, thaum tsaus ntuj, cov qhov rooj hauv qhov chaw cov thwj tim nyob kaw tas, vim lawv ntshai cov Yus Das. Yes Xus los sawv hauv nruab nrab, nws hais rau lawv tias : "Nej nyob kaj lug."
20 Thaum Yes Xus hais lo lus ntawd tas, nws muab nws ob txhais tes thiab nws phab tav rau lawv saib. Cov thwj tim pom Huab Tais, lawv zoo siab kawg.
21 Yes Xus rov hais rau lawv tias : "Nej nyob kaj lug ! Kuv xa nej mus xws li Leej Txiv xa kuv tuaj."
22 Yes Xus hais li tas, nws tshuab pa rau lawv, nws hais rau lawv tias : "Nej txais Leej Ntuj Plig Ntshiab.
23 Nej daws txhaum rau leej twg, mas nws cov txhaum yuav daws. Nej tsis daws leej twg cov txhaum, mas nws cov txhaum yuav nyob."
Năm C có thể đọc :
Zaj Nyeem Ob
Los Mas 8:8-17
Cov lus nyob hauv leej ntshiab Paj Lug tsab ntawv sau tuaj rau cov ntseeg nyob Los Mas
8 Kwv tij sawv daws, cov neeg mloog lub cev, lawv ua xis Tswv Ntuj siab tsis tau.
9 Ntawm nej, mas nej tsis zwm rau lub cev, nej zwm rau lub tswv yim, vim Tswv Ntuj Leej Tswv Yim nyob txawm hauv nej. Tus twg tsis muaj Leej Pleev lub tswv yim nyob hauv nws mas nws tsis yog Leej Pleev tug.
10 Yog Leej Pleev nyob hauv nej, tab yog lub cev tuag vim kev txhaum, mas lub tswv yim muaj txoj sia vim kev ncaj.
11 Yog tus tau tsa Yes Xus tuag sawv rov los, nws lub tswv yim nyob txawm hauv nej, mas nws yuav pub txoj sia rau nej lub cev tuag, vim Leej Ntuj Plig nyob txawm hauv nej.
12 Kuv cov kwv tij, yog li ntawd mas peb tshuav luag nuj nqis, tab sis peb tsis tshuav lub cev nuj nqis. Tsis tas peb yuav ua neej mloog lub cev.
13 Yog nej ua neej mloog lub cev mas nej yuav tuag. Tab sis yog nej cia Leej Ntuj Plig muab lub cev cov hauj lwm tua pov tseg, mas nej yuav muaj txoj sia.
14 Txhua leej txhua tus uas Tswv Ntuj Leej Tswv Yim coj, mas lawv yog Tswv Ntuj cov me nyuam tas huv tib si.
15 Nej tsis tau txais ib lub tswv yim ua qhev ; nej tsis txhob rov qab poob rau hauv txoj kev ntshai. Nej tau txais ib lub tswv yim ua tub ki tshiab, mas nej hu Tswv Ntuj tias : ‘As Npas ! Txiv !’
16 Leej Ntuj Plig nrog peb lub tswv yim zeem tseeb tias peb yog Tswv Ntuj cov me nyuam tiag.
17 Vim peb yog Ntuj cov me nyuam, mas peb yog cov txais lub cuab tam : peb yog cov txais Tswv Ntuj lub cuab tam ; peb nrog Leej Pleev txais ib lub cuab tam, vim peb nrog nws raug txom nyem, peb yuav tau nrog nws muaj hwj chim.
Yog Tswv Ntuj lo Lus
Ntawv Moo Zoo
Zam 14:15-16,23b-26
Nej mloog ib zag nyob hauv leej ntshiab Zam Ntawv Moo Zoo
15 Muaj ib zaug, Yes Xus hais rau nws cov thwj tim tias : "Yog nej nyiam kuv, mas nej yuav coj rawv kuv cov lus qhia.
16 Kuv yuav thov Leej Txiv, ces nws yuav xa dua ib leeg Nplij neeg los nrog nej nyob mus li.
23b Kuv Txiv wb yuav los nyob ze nws, wb yuav ua tsev nyob hauv nws.
24 Tus tsis nyiam kuv, nws tsis khaws kuv cov lus. Lo lus uas nej hnov, tsis yog kuv lo lus, yog Leej Txiv uas xa kuv tuaj lo lus.
25 Thaum kuv tseem nyob ze nej, kuv hais tej no rau nej.
26 Tab sis Leej Nplij Neeg, uas yog Leej Ntuj Plig Ntshiab, mas Leej Txiv yuav xa nws tuaj vim kuv lub npe, nws yuav qhia tas ib puas tsav yam rau nej, thiab nws yuav pab nej rov nco txog tas txhua yam uas kuv tau hais rau nej.
Yog Huab Tais Yes Xus Lub Moo Zoo
){kind=link}