Zaj Nyeem Ib
Hauj Lwm 1:12-14
Tas lawv cov no sawv daws koom ib ub siab, lawv kub siab teev ntuj.
Cov lus nyob hauv ntawv Hauj Lwm
12 Cov thwj tim nqes pem lub roob uas hu ua "Txiv Ntoo Roj" rov mus rau Yes Lus Xas Les.
Lub roob ntawd nyob ze ntawm Yes Lus Xas Les li ntu kev uas hnub Xas Npas Tos kheev mus.
13 Thaum lawv rov los txog,
lawv nce mus saum chav tsev siab uas yog lawv qhov chaw nyob :
muaj Pob Zeb thiab Zam,
Yas Kos thiab As Nres,
Fis Lis Pos thiab Tos Mas,
Npas Tos Los Mas Yos thiab Mas Tais,
Yas Kos uas yog As Fas Yos tus tub,
thiab Xis Moos Siab Kub,
Yus Das uas yog Yas Kos tus tub.
14 Tas lawv cov no sawv daws koom ib ub siab,
lawv kub siab teev ntuj.
Muaj ob peb tug poj niam nrog lawv thiab.
Nyob hauv cov poj niam ntawd,
muaj Mab Liab uas yog Yes Xus niam,
thiab muaj Yes Xus cov kwv tij.
Yog Tswv Ntuj lo Lus
Nkauj Paj Nruag Txais Ntuj Lus
NPN 27:1, 4, 7-8 (13)
(Nqua Suab Cav Txog Tswv Ntuj, 35)
Txais: Kuv tso siab tias kuv yuav pom txhua yam zoo,
uas Huab Tais ua nyob hauv tsoom neeg ciaj lub teb chaws.
1. Huab Tais yog kuv qhov pom kev.
Nws yog tus cawm kuv,
kuv yuav ntshai leej twg ?
Huab Tais yog lub yeej ntsa zeb thaiv kuv lub neej,
kuv yuav ntshai leej twg ? Teb.
2. Muaj ib yam kuv thov ntawm Huab Tais
yog thov kom kuv tau nyob hauv Huab Tais tsev tas kuv sim neej,
kom kuv tau ntsia ntsoov Huab Tais txoj kev hlub
thiab tsob hwb nws lub tuam tsev. Teb.
3. Huab Tais,
koj mloog kuv lub suab hu koj !
Thov koj hlub kuv,
koj teb kuv mas.
Kuv nco txog koj lo lus hais tias,
“Nej nrhiav kuv lub ntsej muag.” Teb.
Zaj Nyeem Ob
1 Pob Zeb 4:13-16
Yog nej raug luag tsawm, vim Leej Pleev lub npe, mas nej txoj hmoov zoo.
Cov lus Pob Zeb sau tuaj rau cov ntseeg tsab ntawv ib
13 Kwv tij sawv daws,
Nej nrog Leej Pleev raug txom nyem npaum li cas,
nej yuav zoo siab npaum li ntawd thiab,
ces thaum nws lub hwj chim yuav tawm los rau pom xyeem,
mas nej yuav tau nyob hauv txoj kev kaj siab lug,
nej yuav lom zem.
14 Yog nej raug luag tsawm,
vim Leej Pleev lub npe,
mas nej txoj hmoov zoo,
vim Leej Ntuj Plig muaj hwj chim,
uas yog Tswv Ntuj Leej Tswv Yim tuaj roos nej.
15 Nej yuav tsis txhob muaj ib tug uas nws raug tsim txom vim nws tua neeg,
los nws ua tub sab,
los ua phem rau luag,
los nws mus kom luag.
16 Hos yog nej ib tug raug tsim txom vim nws yog ib tug Pleev,
mas nws tsis txhob txaj muag :
nws yuav cav txog Tswv Ntuj,
vim Tswv Ntuj pub lub npe ‘Pleev’ rau nws.
Yog Tswv Ntuj lo Lus
Nkauj Cav Txog Lub Moo Zoo
Zam 14:18
(Nqua Suab Cav Txog Tswv Ntuj, 231, nqe 2)
As les lus yas. As les lus yas.
Kuv yuav tsis cia nej ua ntsuag mog.
Kuv yuav rov los cuag nej ces nej yuav muaj kev kaj.
As les lus yas.
Ntawv Moo Zoo
Zam 17:1-11a
Txiv, Koj ua kom koj Leej Tub muaj koob meej mas.
Nej mloog ib zag nyob hauv Zam Ntawv Moo Zoo
1 Yes Xus hais li ntawd tas,
nws tsa muag ntsia saum ntuj, nws hais tias:
"Txiv, txog sij hawm lawm !
Koj ua kom koj Leej Tub muaj koob meej mas.
Ces koj Leej Tub yuav ua kom koj muaj koob meej,
2 vim koj muab hwj huam rau nws kav tas txhua leej txhua tus,
kom nws pub txoj sia nyob mus li rau txhua leej uas koj muab rau nws.
3 Txoj sia nyob mus li yog zoo li no :
kom lawv paub koj,
uas yog tus tseem Tswv Ntuj,
thiab paub Yes Xus Pleev uas yog tus koj xa tuaj.
4 Kuv ua kom koj muaj koob meej nyob ntiaj teb no,
vim tias cov hauj lwm uas koj muab rau kuv ua,
mas kuv ua tiav lawm.
5 Txiv, nyem no koj ua kom kuv muaj koob meej nyob ntawm koj xub ntiag,
yog lub koob meej uas kuv muaj txawm rau ntawm koj xub ntiag thaum lub sim ceeb tsis tau xeeb los nyob.
6 "Cov neeg koj rho hauv lub qab ntuj los pub rau kuv,
mas kuv ua kom lawv pom xyeem koj lub Npe.
Cov neeg no yog koj tug,
koj muab lawv pub rau kuv,
ces lawv coj rawv koj lo lus.
7 Nyem no lawv paub tias tas txhua yam uas koj muab rau kuv yog tuaj ntawm koj tuaj.
8 Vim tias cov lus uas koj muab rau kuv,
mas kuv muab pub rau lawv lawm.
Lawv txais koj cov lus,
ces lawv paub tseeb tias kuv tuaj ntawm koj tuaj,
thiab lawv ntseeg tias yog koj xa kuv tuaj.
9 Kuv thov koj rau lawv.
Kuv tsis thov koj rau lub qab ntuj neeg,
kuv thov koj rau cov uas koj muab pub rau kuv,
vim lawv yog koj tug.
10 Txhua yam uas yog kuv tug,
kuj yog koj tug ;
txhua yam uas yog koj tug,
kuj yog kuv tug thiab.
Kuv muaj koob meej nyob hauv lawv.
11a Kuv tsis nyob hauv lub qab ntuj no ntxiv lawm,
tab sis lawv tseem nyob hauv lub qab ntuj no.
Hos kuv, mas kuv los cuag koj.
Yog Huab Tais Yes Xus Lub Moo Zoo
