Zaj Nyeem Ib
Yes Les Mias 20:10-13
Tswv Ntuj tus Yaj Saub hnov sawv daws cem nws thiab thuam nws, vim nws qhuab qhia sawv daws. Tab sis nws tsos siab tias Tswv Ntuj yuab pab nws kom nws yeej sawv daws.
Cov lus nyob hauv ntawv Yes Les Mias
Yes Les Mias hais tias :
10 Huab Tais, kuv hnov ntau leej hais tej yam ntais ntuj txog kuv tias :
"Peb kav tsij tso hem thawj rau nws tsis tseg mas !
Peb mus kom nws rau cov nom !"
Cov uas thaud lawv yog kuv cov phooj ywg,
lawv nyas saib kuv puas yuav ntog.
Lawv hais tias :
"Nyaj tej zaus,
nws yuav mloog cov neeg ntxias.
Ces peb yuav yeej nws,
peb yuav tau kev rob caub."
11 Tab sis Huab Tais tsa kuv cai,
Huab Tais yog zoo li ib tug peeb zeej zog nchav.
Kuv cov yeeb ncuab yuav ntog,
lawv yuav tsis yeej.
Lawv yuav nco ntsoov ib txhiab ib txhis txog hnub lawv poob ntsej muag.
12 Huab Tais,
koj yog tus kav tsoom tub rog,
koj tsom tau tus neeg siab ncaj,
koj pom nyob hauv neeg nruab siab.
Kuv vam tias kuv yuav pom koj rob caub rau lawv,
vim kuv tso kuv rooj plaub rau hauv koj tes.
13 Nej hu nkauj rau Huab Tais,
nej cav lus zoo txog Huab Tais,
vim nws npo tus neeg pluag tus plig ntawm cov neeg phem txhais tes los.
Yog Tswv Ntuj lo Lus
Nkauj Paj Nruag Txais Ntuj Lus
NPN 69:8-10, 14, 17, 33-35 (14c)
(Nqua Suab Cav Txog Tswv Ntuj, 51)
Txais: Huab Tais,
Koj txoj kev hlub loj tas nrho, thov Koj teb kuv.
1. Huab Tais, yog vim koj, kuv thiaj raug luag tsawm.
Yog vim koj, kuv thiaj tau kev txaj muag.
Kuv cov kwv tij nrauj kuv pov tseg.
Kuv niam cov tub saib kuv zoo li tus qhua
vim kuv lub siab kub lug rau koj lub tuam tsev.
Lawv tsawm koj, lawv cov lus tsawm poob los rau saum kuv. Teb.
2. Huab Tais, kuv hu txog koj,
thov koj teb kuv vim koj yog tus cawm kuv.
Huab Tais, thov koj teb kuv vim koj yog kuv tus Tswv.
Koj tig los ntsia kuv, thov koj khuv leej kuv. Teb.
3. Cov neeg me, nej tig ntsia, nej zoo siab hlo.
Nej cov uas nrhiav Tswv Ntuj, nej ua siab loj mog!
Huab Tais hnov cov pluag lo lus thov.
Thaum nws cov neeg raug luag ntes, nws tsis tso lawv pov tseg.
Lub ntuj, lub ntiaj teb, dej ntuj thiab tej tsiaj txhu
hauv hiav txwv cav txog Tswv Ntuj. Teb.
Zaj Nyeem Ob
Los Mas 5:12-15
Ntuj lub txiaj ntsim muaj zog dua neeg cov txhaum. Yes Xus txoj kev them txim txhaum muaj zog dua tas sib zeej tsoom neeg cov txhaum.
Cov lus Paj Lug sau tuaj rau cov ntseeg nyob Los Mas
Kwv tij sawv daws,
12 Yog vim tib tug neeg xwb,
mas kev txhaum tau tshwm los nyob hauv lub ntiaj teb,
ces kev txhaum coj kev tuag los.
Txoj kev tuag thiaj raug tas zeej tsoom,
vim sawv daws ua txhaum.
13 Kev txhaum xub tshwm los nyob ntiaj teb ua ntej Txoj Cai,
tab sis thaum tsis muaj Txoj Cai,
mas yus tsis ris lub txim txhaum.
Txij As Das los txog Mais Xes,
kev tuag ua vaj kav sawv daws :
14 tab yog cov neeg tsis tau ua tej yam txhaum zoo nkaus li As Das mas lawv kuj zwm rau kev tuag,
vim As Das yog tus duab qhia txog tus yuav tuaj.
15 Tab sis lub txiaj ntsim tsis zoo li kev txhaum.
Vim ib tug xwb ua txhaum mas tas zeej tsoom tuag.
Nyem no Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev haj yam ntws los ntau rau zeej tsoom.
Yog Tswv Ntuj lo Lus
Nkauj Cav Txog Lub Moo Zoo
Zam 15:26ab, 27a
(Nqua Suab Cav Txog Tswv Ntuj, 230, nqe 2)
As les lus yas. As les lus yas.
Huab Tais hais tias,
“Leej Ntuj Plig Ntshiab yuav tuaj,
Nws yog Leej Ntuj Plig qhia qhov tseeb.
Nws yuav ua tim khawv txog Kuv.
Nej kuj yuav ua tib yam vim nej ib txwm nrog Kuv.
As les lus yas.
Ntawv Moo Zoo
Mas Tais 10:26-33
Peb tsis txhob ntshai tshaj Ntuj lus vim Tswv Ntuj pov hwm peb. Yog yus ntshai zeem tseeb txog Yes Xus mas Yes Xus thiaj cev tsis tau yus rau nws Leej Txiv.
Nej mloog ib zag nyob hauv Mas Tais Ntawv Moo Zoo
Muaj ib zaug, Yes Xus hais rau nws cov thwj tim tias :
26 "Nej txhob ntshai luag hem !
Vim tsis muaj ib yam npog rawv uas yuav tsis qhib tawm,
tsis muaj ib yam zais ntshis uas yuav tsis tawm los rau sawv daws paub.
27 Tej yam uas kuv hais rau nej hauv qhov tsaus ntuj,
nej yuav hais tawm nruab hnub nrig.
Hos yam nej hnov ntxhi rau hauv nej pob ntseg,
mas nej yuav nce mus tshaj saum ruv tsev.
28 "Nej txhob ntshai cov neeg tua nej lub cev,
tab sis lawv tua tsis tau nej tus plig.
Nej yuav ntshai tus muaj peev xwm rhuav nej lub cev thiab tus plig hauv hav hluav taws.
29 Ob tug noog tsig txhuv,
luag tsuas muag tau ib npib xwb.
Tsis kav,
tsis muaj ib tug poob hauv av tau,
yog nej Txiv tsis tso lus.
30 Nej kuj ib yam li ntawd,
tab yog nej cov plaub hau,
nej Txiv yeej suav tas huv si lawm.
31 Nej tsis txhob ntshai dab tsi mog,
nej muaj nqis tshaj tej pab tsig txhuv coob coob ua ke.
32 "Leej twg lees rau sawv daws tias nws paub kuv,
mas kuv kuj lees rau kuv Txiv nyob saum Ntuj tias kuv paub nws.
33 Hos tus tsis lees rau sawv daws tias nws paub kuv,
kuv kuj yuav tsis lees rau kuv Txiv nyob saum ntuj tias kuv paub nws.
Yog Huab Tais Yes Xus Lub Moo Zoo
){kind=link}