Zaj Nyeem Ib
1 Xas Muas 3: 3b-10.19
Cov uas Tswv Ntuj hu lawv los ua nws cov neeg tshaj nws cov lus, mas yog cov xyiv fab mloog Tswv Ntuj tuaj tshoj lawv.
Cov lus nyob hauv ntawv Xas Muas phau ib
3b Muaj ib zaug, Xas Muas pw hauv Huab Tais Kem Ntshiab uas Tswv Ntuj lub Xab Cog Lus nyob.
4 Huab Tais hu Xas Muas tias : "Xas Muas ! Xas Muas !" Tus me nyuam teb tias : "Kuv nyob ntawm no !"
5 Ces nws khiav mus hais rau Es Lis tias : "Koj hu kuv, kuv thiaj los." Es Lis hais tias : "Tub, kuv tsis tau hu koj. Koj rov mus pw." Xas Muas rov mus pw.
6 Huab Tais rov hu nws dua tias : "Xas Muas ! Xas Muas !" Ces Xas Muas mus txog ntawm Es Lis, nws hais rau Es Lis tias : "Koj hu kuv, kuv thiaj los ntawm no." Es Lis hais tias : "Tub, kuv tsis tau hu koj. Koj rov mus pw."
7 Xas Muas tseem tsis tau paub Huab Tais. Vim tsis tau muaj leej twg qhia Huab Tais lo lus rau nws.
8 Huab Tais rov hu Xas Muas zaum peb. Xas Muas sawv mus txog ntawm Es Lis, nws hais tias : "Koj hu kuv, kuv thiaj los ntawm no."
9 Ces Es Lis thiaj mam to taub tias yog Huab Tais hu tus me nyuam ntawd. Es Lis hais rau Xas Muas tias : "Koj mus pw. Yog muaj tus hu koj mas koj yuav hais tias : Huab Tais, koj hais lus mas. Koj tus tub txib mloog koj !" Ces Xas Muas rov mus pw qhov chaw qub.
10 Huab Tais tuaj nyob ntawd. Huab Tais hu nws xws li thawj peb zaug ua ntej tias : "Xas Muas ! Xas Muas !" Xas Muas teb tias : "Koj hais lus mas ! Koj tus tub txib mloog koj !"
19 Xas Muas hlob. Huab Tais nrog nws nyob. Huab Tais tau hais dab tsi rau Xas Muas lawm mas Huab Tais tsis ua yam ntawd poob li !
Yog Tswv Ntuj lo Lus
Nkauj Paj Nruag Txais Ntuj Lus
NPN 40:2, 4, 7-8a, 8b-9, 10 (8a, 9a)
(Nqua Suab Cav Txog Tswv Ntuj, 106)
Txais: Tswv Ntuj, kuv nyob ntawm no. Kuv yuav ua raws li koj lub siab nyiam.
1. Kuv tos ntsoov Huab Tais !
Nws khoov los ze kuv thiab nws hnov kuv lub suab.
Nws tso ib zag nkauj tshiab rau hauv kuv lub ncauj,
yog zaj nkauj cav txog peb tus Tswv Ntuj. Teb.
2. Koj qhib kuv pob ntseg kom kuv hnov koj cov lus.
Koj tsis xav yuav tsiaj thiab txhiam xws txi rau koj.
Koj tsis kom kuv hlawv tsiaj los them txim txhaum.
Kuv thiaj hais tias, “Koj saib kuv tuaj cuag koj.” Teb.
3. Kuv tus Tswv Ntuj,
kuv yuav ua raws li cov lus koj sau tseg rau kuv
nyob hauv kauj ntawv.
Kuv zoo siab ua raws li koj qhia.
Koj txoj cai nyob rawv hauv kuv nruab siab. Teb.
4. Kuv tshaj koj txoj kev ncaj nyob hauv cov txoos.
Huab Tais, koj paub tias kuv yeej tsis cheem kuv di ncauj. Teb.
Zaj Nyeem Ob
1 Kos Lis Nthos 6: 13c-15a,17-20
Cov neeg ntseeg txog Yes Xus, lawv coj lawv lub cev mus taug kev mloog Yes Xus. Lawv tsis mus taug kev plees kev yis.
Cov lus Paj Lug sau tuaj rau cov ntseeg nyob Kos Lis Nthos tsab ntawv ib
13c Kwv tij sawv daws, lub cev tsis yog cia ua dev ua npua. Lub cev yog tshwj tseg rau Huab Tais, thiab Huab Tais kuj tshwj zias nws tseg rau lub cev.
14 Tswv Ntuj uas nws tau tsa Huab Tais sawv rov los, nws lub hwj huam kuj yuav tsa peb sawv rov los thiab.
15a Nej tsis paub tias nej lub cev yog Leej Pleev cov tes taw lod ?
17 Hos tus npuab Huab Tais, nws nrog Huab Tais koom ib lub tswv yim xwb.
18 Nej txav deb ntawm txoj kev ua dev ua npua mog. Tas puas tsav yam txhaum neeg ua, mas tsuas yog txhaum tuaj sab nraud tuaj rau hauv neeg lub cev. Hos tus ua dev ua npua, mas nws ua txhaum rau nws lub cev kiag.
19 Nej tsis paub tias nej lub cev yog Leej Ntuj Plig Ntshiab lub tsev nyob lod ? Nws nyob hauv nej ; nej txais nws ntawm Tswv Ntuj los. Tab sis nej tsis paub tias nej tsis yog nej tug.
20 Vim muaj tus tau muas nej tiag ! Li ntawd mas nej kav tsij ua kom Tswv Ntuj muaj koob meej nyob hauv nej lub cev mog !
Yog Tswv Ntuj lo Lus
Nkauj Cav Txog Lub Moo Zoo
Zam 1:41.17b
(Nqua Suab Cav Txog Tswv Ntuj, 217, nqe 1)
As les lus yas. As les lus yas. Wb ntsib tus Mes Xias uas yog Leej Pleev, tus coj txoj kev tseeb thiab lub txiaj ntsim tuaj rau peb. As les lus yas.
Ntawv Moo Zoo
Zam 1: 35-42
Yes Xus cov thwj tim xub ntsib Yes Xus thawj zaug, lawv qhuas txog Yes Xus tam sid.
Nej mloog ib zag nyob hauv Zam ntawv Moo Zoo
35 Muaj ib hnub, Zam nrog nws ob tug thwj tim rov sawv ntsug nyob ntawd dua.
36 Nws ntsia Yes Xus hla tuaj mus, nws hais tias : "Neb ntsia ! Tswv Ntuj tus Yaj."
37 Ob tug thwj tim hnov Zam hais li ntawd, nkawd raws Yes Xus qab mus.
38 Yes Xus tig los, nws pom nkawd raws nws, ces Yes Xus hais rau nkawd tias : "Neb nrhiav dab tsi ?" Nkawd hais rau Yes Xus tias : "Las Npis, lo lus no txhais tias Xib Hwb, koj tsev nyob qhov twg ?"
39 Yes Xus hais rau nkawd tias : "Neb tuaj, neb yuav pom." Ces nkawd mus, nkawd pom qhov chaw Yes Xus nyob. Hnub ntawd, nkawd nrog Yes Xus nyob. Thaum ntawd kwv yees plaub teev hnub qaij.
40 Ob tug thwj tim uas hnov Zam hais li ntawd thiab nkawd raws Yes Xus qab mus, ib tug yog As Nres, Xis Moos Pob Zeb tus kwv.
41 As Nres xub ntsib nws tus tij laug Xis Moos, nws hais rau Xis Moos tias : "Wb ntsib tus Mes Xias lawm," - lo lus no txhais tias Leej Pleev -
42 As Nres coj Xis Moos mus cuag Yes Xus. Yes Xus ntsia Xis Moos, nws hais tias : "Koj yog Xis Moos, Zam tus tub, koj lub npe yuav hu ua Kes Fas," - lo lus no txhais tias - : Pob Zeb.
Yog Huab Tais Yes Xus Lub Moo Zoo
