Zaj Nyeem Ib
Hauj Lwm 5:12-16
Cov neeg ntseeg tiag Yes Xus sawv rov los mas lawv ua hwj huam yees ntxwv xws li Yes Xus, vim lawv coj tus yam ntxwv xa kev kaj siab lug mus rau sawv daws.
Cov lus nyob hauv Ntawv Hauj Lwm
12 Lub caij ntawd, Ntuj siv cov Hauv Paus Xa Lus ob txhais tes los ua ntau lub cim thiab ntau yam hwj huam yees ntxwv nyob hauv tsoom pej xeem. Cov ntseeg koom siab koom ntsws tuaj nyob hauv lub qab ruv tsev Xas Los Moos.
13 Tsis muaj leej twg muaj cuab kav tuaj nrog lawv ua ke. Tab sis tsoom pej xeem cav lus zoo txog lawv.
14 Cov ntseeg los ntxiv coob zuj zus rau Huab Tais, tej pab txiv neej thiab poj niam coob kawg ...
15 Ces lawv coj cov neeg mob tuaj tso ntawm kev, lawv tso cov mob pw saum tej lub txaj thiab tej daim lev, kom thaum Pob Zeb hla los mus, nws tus duab ntxoov tus puav neeg mob.
16 Tsoom neeg coob coob ntawd tuaj ntawm cov zos tsis deb ntawm Yes Lus Xas Les tuaj. Lawv coj cov neeg mob thiab cov neeg raug dab tsis huv tuaj. Sawv daws puav leej zoo tas huv si.
Yog Tswv Ntuj Lo Lus
Nkauj Paj Nruag Txais Ntuj Lus
NPN 118:2-4,13-15,22-24(1)
(Nqua Suab Cav Txog Tswv Ntuj, 159)
Txais: Peb ua Huab Tais tsaug vim Nws siab zoo, Nws khuv leej neeg mus ib txhiab ib txhis.
Hoặc : As les lus yas.
1. His Xas Lais, nej hais tias,
“Nws khuv leej neeg mus ib txhiab ib txhis !”
As Loos tsev neeg, nej hais tias,
“Nws khuv leej neeg mus ib txhiab ib txhis !”
Tsoom neeg hwm Huab Tais, nej hais tias,
“Nws khuv leej neeg mus ib txhiab ib txhis !” Teb.
2. Luag thawb kuv kom kuv ntog, tab sis Huab Tais pab kuv.
Kuv lub zog, kuv rab peev xwm yog Huab Tais, nws yog tus cawm kuv.
Cov neeg ncaj qw suab zoo siab hauv lawv cov tsev tsam phooj
vim lawv tau txais kev yeej. Teb.
3. Lub pob zeb uas cov txhim tsev muab pov tseg
txia ua lub pob zeb txheem tsev.
Yam hwj huam loj no yog Huab Tais ua.
Nws ua hwj huam muaj koob meej nto moo rau peb qhov muag pom.
Hnub no yog hnub Huab Tais tau tsim los rau peb, peb zoo siab hom khaj. Teb.
Zaj Nyeem Ob
Qhib Yav Tom Ntej 1:9-11a.12-13.17-19
Muaj ib hnub, Yes Xus tawm tuaj rau Zam pom xyeem.Yes Xus hnav xws li ib tug Vaj, xws li ib tug Leej Choj. Nws hais tias : kuv tuag ib zaug, tab sis, nyem no, kuv nyob mus li. Niaj hnub chiv Yes Xus kuj ntuas peb zoo li ntawd thiab.
Cov lus nyob hauv Ntawv Qhib Yav Tom Ntej
9 Kuv yog Zam, nej tus kwv, uas nrog nej raug kev iab kev khwv, nrog nej ua siab ntev siab tawv, nyob hauv Yes Xus thiab nyob hauv lub ceeb tsheej. Thaum ntawd kuv nyob hauv lub pov txwv Pas Mos, vim Tswv Ntuj Lo Lus, thiab vim txoj kev ua tim khawv txog Yes Xus.
10 Hnub ntawd yog Huab Tais hnub, kuv lub tswv yim feeb rau nruab yeeb. Ces kuv hnov ib lub suab nrov, xws li lub hom tom kuv nraub qaum tuaj tias :
11a “Koj sau tej yam koj pom rau hauv ib phau ntawv, xa mus rau xya lub Koom Txoos
12 Kuv tig mus ntsia lub suab hais lus tuaj rau kuv ntawd. Kuv tig mus, ua ciav kuv pom xya tus ncej kub txawb teeb.
13 Cov ncej ntawd nyob ncig ib tug zoo li Tib Neeg ib Leeg Tub. Nws hnav ib lub tsho ntev, sia ib txog siv kub ntawm duav.
17 Kuv pom nws, kuv vau hlo rau ntawm nws ko taw, xws li kuv tuag lawm. Tab sis nws muab nws txhais tes xis los chwv kuv, thiab nws hais tias : “Txhob ntshai ! Yog kuv ! Kuv yog tus Thawj, tus Kawg, tus Muaj Txoj Sia.
18 Kuv tau tuag lawm ; tab sis nyem no, kuv muaj txoj sia mus li txheej dhau txheej. Kuv tuav tus yawm sij hauv txoj kev tuag thiab hauv tub tuag teb.
19 Koj yuav sau tej yam koj pom, yam li tej uas tab tom tshwm sim nyem no, thiab tej uas yuav tshwm sim tuaj yav pem suab.
Yog Tswv Ntuj Lo Lus
Nkauj Cav Txog Lub Moo Zoo
Zam 20:29
(Nqua Suab Cav Txog Tswv Ntuj, 238, nqe 1)
As les lus yas. As les lus yas. Huab Tais hais tias, “Tos Mas, yog vim koj pom kuv koj thiaj ntseeg. Cov tsis tau pom kuv, lawv ntseeg mas lawv txoj hmoov zoo.” As les lus yas.
Ntawv Moo Zoo
Zam 20:19-31
Cov neeg ntseeg tias Yes Xus sawv rov los mas Yes Xus pub lawv nyob kaj lug.
Nej mloog ib zag nyob hauv leej ntshiab Zam Ntawv Moo Zoo
19 Tib hnub ntawd thaum tsaus ntuj, uas yog thawj hnub pib lub lis piam, cov qhov rooj hauv qhov chaw cov thwj tim nyob kaw tas, vim lawv ntshai cov Yus Das. Yes Xus los sawv hauv nruab nrab, nws hais rau lawv tias : "Nej nyob kaj lug."
20 Thaum Yes Xus hais lo lus ntawd tas, nws muab nws ob txhais tes thiab nws phab tav rau lawv saib. Cov thwj tim pom Huab Tais, lawv zoo siab kawg.
21 Yes Xus rov hais rau lawv tias : "Nej nyob kaj lug ! Kuv xa nej mus xws li Leej Txiv xa kuv tuaj."
22 Yes Xus hais li tas, nws tshuab pa rau lawv, nws hais rau lawv tias : "Nej txais Leej Ntuj Plig Ntshiab.
23 Nej daws txhaum rau leej twg, mas nws cov txhaum yuav daws. Nej tsis daws leej twg cov txhaum, mas nws cov txhaum yuav nyob."
24 Tos Mas yog ib tug hauv pab Kaum Ob, nws tseem hu ua Dis Dws Mos thiab. Thaum Yes Xus tawm los, mas nws tsis nrog cov thwj tim nyob.
25 Lwm cov thwj tim hais rau nws tias : "Peb pom Huab Tais lawm !" Ces Tos Mas hais rau lawv tias : "Yog kuv tsis pom lub qhov txhab ntsia hlau nyob hauv nws ob txhais tes, yog kuv tsis muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes rau ntawm nws phab tav, mas kuv tsis ntseeg."
26 Yim hnub tom qab, cov thwj tim rov nyob hauv tsev dua. Tos Mas kuj nrog lawv nyob thiab. Cov qhov rooj puav leej kaw tas. Yes Xus tawm los sawv hauv nruab nrab, nws hais rau lawv tias : "Nej nyob kaj lug !"
27 Ces Yes Xus hais rau Tos Mas tias : "Cev koj ntiv tes rau ntawm no, koj ntsia kuv ob txhais tes. Cev koj txhais tes los, muab rau hauv kuv phab tav. Koj txhob ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias : "Kuv tus Huab Tais, Kuv tus Tswv Ntuj."
29 Yes Xus hais rau Tos Mas tias : "Vim koj pom kuv, mas koj thiaj ntseeg. Cov uas tsis tau pom tab sis lawv ntseeg, mas lawv txoj hmoov zoo."
30 Yes Xus tseem tau ua lwm cov cim ntau nyob ntawm cov thwj tim xub ntiag, uas tsis tau muab sau rau hauv phau ntawv no.
31 Tau muab cov cim no sau tseg kom nej ntseeg tias Yes Xus yog Leej Pleev, Tswv Ntuj Leej Tub. Nej ntseeg ces nej yuav muaj txoj sia nyob hauv nws lub npe.
Yog Huab Tais Yes Xus Lub Moo Zoo.
){kind=link}