Zaj Nyeem Ib
Hauj Lwm 14:21b-27
Cov pab neeg nyuam qhuav txais kev ntseeg tsis tau ntev, lawv yuav sib pab sib nres tiv txoj kev raug luag hiam. Cov Leej Choj, cov tub tshaj Ntuj Lus, cov muaj zog dua cov nyob hauv txoj kev ntseeg sawv daws sib pab.
Cov lus nyob hauv Ntawv Hauj Lwm
21b Lub caij ntawd, thaum nkawd tshaj Ntuj lus tas nyob hauv lub tsheej Des Npes, thiab nkawd qhia tau ib pab thwj tim coob lawm, Paj Lug nrog Npas Nas Npes rov mus Lis Ros, rau Is Kos Nias thiab rau As Nthias Kias.
22 Nkawd pab kom cov thwj tim ua siab ruaj tawv qhawv nyob hauv txoj kev ntseeg. Nkawd qhia tias : "Peb yuav tsum raug ntau yam kev txom nyem, peb thiaj yuav tau mus hauv Tswv Ntuj lub Ceeb Tsheej."
23 Nkawd tsa ib co txwj laus nyob hauv txhua lub koom txoos. Thaum nkawd nrog sawv daws hais cov zaj teev ntuj thiab yoo mov tas, mas nkawd muab lawv cob rau tus Huab Tais uas lawv ntseeg txog.
24 Ces nkawd hla Pis Xis Dias teb mus txog Pas Fis Lias teb.
25 Thaum nkawd tshaj ntuj lus nyob Pes Zes tas lawm, mas nkawd thiaj li mus nram As Tas Lias.
26 Nkawd caij nkoj nyob As Tas Lias mus rau As Nthias Kias uas yog lub tsheej nkawd sawv kev mus tshaj Ntuj lus. Tswv Ntuj lub txiaj ntsim tau pab nkawd ua hauj lwm tiav lawm.
27 Thaum nkawd los txog As Nthias Kias, mas nkawd hu lub Koom Txoos tas huv si kom tuaj, nkawd piav txog tej yam Tswv Ntuj tau pab nkawd ua rau sawv daws mloog : nkawd piav tias Tswv Ntuj tau qhib cov neeg teev dab lub siab kom lawv ntseeg.
Yog Tswv Ntuj Lo Lus
Nkauj Paj Nruag Txais Ntuj Lus
NPN 145:8-9, 10-11, 12-13 (1)
(Nqua Suab Cav Txog Tswv Ntuj, 162)
Txais: Kuv tus Huab Tais Tswv Ntuj, kuv yuav cav txog Koj lub npe mus ib txhiab ib txhis.
Hoặc : As les lus yas.
1. Huab Tais siab zoo, nws khuv leej neeg, nws tsis npau taws sai.
Huab Tais ua zoo rau txhua leej txhua tus.
Nws hlub thiab txuag nws tej dej num. Teb.
2. Huab Tais, txhua yam koj tsim los ua koj tsaug.
Cov ntseeg txog koj yuav cav lus zoo txog koj.
Lawv yuav cav txog koj txoj kev ua vaj nto koob meej.
Lawv yuav tshaj txog koj cov hauj lwm muaj hwj xyeej. Teb.
3. Lawv yuav qhia koj txoj kev ua vaj muaj hwj chim
thiab koj lub Ceeb Tsheej ci ntsa iab rau As Das tsoom tub ki paub.
Koj lub Ceeb Tsheej yog lub Ceeb Tsheej nyob txhiab niag tim puas xyoo.
Koj yuav ua vaj mus txheej dhau txheej. Teb.
Zaj Nyeem Ob
Qhib Yav Tom Ntej 21:1-5a
Lub caij peb tseem hla lub ntiaj teb no, peb yuav xav txog hnub uas lub ntiaj teb neeg yuav mus ntsib Tswv Ntuj. Thaum ntawd, peb yuav pom Tswv Ntuj xyeem ntawm qhov muag.
Cov lus nyob hauv Ntawv Qhib Yav Tom Ntej
1 Kuv yog Zam, ces kuv pom ib lub ntuj tshiab thiab ib lub ntiaj teb tshiab. Vim tias thawj lub ntuj thiab thawj lub ntiaj teb ploj tas lawm. Hiav txwv kuj tsis nyob ntxiv lawm.
2 Ces kuv pom lub nroog Ntshiab, uas yog Yes Lus Xas Les tshiab nqes saum ntuj, pem Tswv Ntuj los. Nws ua zam sees xws li tus nkauj nyab ntim zam tos nraug vauv.
3 Kuv hnov ib lub suab tuaj ntawm lub theej kiab tuaj tias : “Saib ! Tswv Ntuj lub tsev los nrog neeg nyob : Tswv Ntuj yuav nrog lawv nyob ! Lawv yuav yog nws haiv neeg. Tswv Ntuj yuav nrog lawv nyob.
4 Nws yuav so txhua lub kua muag ntws ntawm lawv qhov muag. Yuav tsis muaj kev tuag ntxiv. Yuav tsis muaj kev quaj kev nyiav, kev ntsaj, kev mob ntxiv. Vim tas txhua yam muaj sia uas tau xub tshwm sim los, puav leej ploj tas huv tib si lawm.”
5a Ces tus zaum saum lub theej kiab hais tias : “Nej saib ! Kuv tsim dua txhua tsav txhua yam tshiab.”
Yog Tswv Ntuj Lo Lus
Nkauj Cav Txog Lub Moo Zoo
Zam 13:34
(Nqua Suab Cav Txog Tswv Ntuj 238, nqe 5)
As les lus yas. As les lus yas. Huab Tais hais tias : “Kuv muab ib lo lus tshiab tso rau hauv nej. Nej yuav sib nyiam sib hlub li Kuv nyiam thiab hlub nej”. As les lus yas.
Ntawv Moo Zoo
Zam 13: 31-33a.34-35
Yog vim Yes Xus nyiam Leej Txiv, nws thiaj tau txais lub hwj chim thiab lub koob meej loj. Yog peb sib nyiam sib hlub nyob hauv Yes Xus mas peb thiaj yuav muaj koob meej nyob ntawm Tswv Ntuj xub ntiag.
Nej mloog ib zag nyob hauv leej ntshiab Zam Ntawv Moo Zoo
31 Thaum Yus Das tawm mus lawm, Yes Xus hais tias : "Nyem no Neeg Leej Tub twb txais koob meej lawm, thiab Tswv Ntuj kuj muaj koob meej nyob hauv nws.
32 Yog Tswv Ntuj muaj koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tshuav tsis ntev, Tswv Ntuj yuav muab koob meej rau Neeg Leeg Tub.
33a Cov me nyuam me, kuv yuav nrog nej nyob me ntsis ntxiv xwb.
34 "Kuv muab ib lo lus qhia tshiab rau nej : yam li nej yuav sib nyiam sib hlub. Nej yuav rov sib nyiam sib hlub ib yam li kuv tau nyiam nej.
35 Qhov yuav ua kom sawv daws paub tias nej yog kuv cov thwj tim, yog qhov no : nej sib nyiam sib hlub."
Yog Huab Tais Yes Xus Lub Moo Zoo.
){kind=link}