Zaj Nyeem Ib
Hauj Lwm 12:1-11
Vim Pob Zeb tshaj Ntuj Lus mas nws raug luag muab nws kaw.Tswv Ntuj npo nws. Pob Zeb tshaj Ntuj Lus ntxiv mus txog hnub lawv muab nws dai saum nto cuam.
Cov lus nyob hauv Ntawv Hauj Lwm
1 Ze lub sij hawm ntawd, mas Hes Los ntes ob peb tug neeg nyob hauv lub Koom Txoos. Nws xav hiam lawv.
2 Nws xuas ntaj txiav Zam tus tij laug Yas Kos taub hau.
3 Hes Los pom tias cov Yus Das zoo siab rau qhov nws ua, ces nws tso neeg mus ntes Pob Zeb thiab. Hnub ntawd yog hnub noj cov ncuav mov tsis muaj poov xab.
4 Hes Los ntes tau Pob Zeb lawm, nws muab Pob Zeb kaw hauv tsev loj faj. Hes Los kom plaub pab tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho, mas nws yuav kom Pob Zeb tawm los rau ntawm tsoom pej xeem xub ntiag.
5 Thaum luag muab Pob Zeb kaw hauv tsev loj faj, mas lub Koom Txoos thov Tswv Ntuj tsis tseg rau Pob Zeb.
6 Txog hnub Hes Los yuav txiav txim rau Pob Zeb, hmo ntawd Pob Zeb tsaug zog nyob nruab nrab ob tug tub rog, ib txog hlua khi rawv nws rau ntawm ob tug tub rog, hos tseem muaj ib co zov qhov rooj nyob sab nraud thiab.
7 Ib sij huam, Huab Tais tus Tshiab tawm los ua kem tsev pom kev lug. Tus Tshiab tuav Pob Zeb, tsa nws sawv, hais rau nws tias : "Koj sawv tsees Tam sim no !" Cov hlua khi Pob Zeb ob txhais tes cia li plam plaws.
8 Tus Tshiab hais ntxiv tias : "Muab koj txoj siv sia thiab rau koj nkawm khau !" Pob Zeb sia zoj siv, rau zoj khau tas. Tus Tshiab tseem hais tias : "Muab koj lub tsho ntev pov saum koj xub pwg tso, koj lawv kuv qab !"
9 Ces Pob Zeb lawv tus Tshiab qab tawm mus. Pob Zeb tsis paub meej tias puas yog tiag, nws xav tias yog nws ua yog toog pom ib tug Tshiab xwb.
10 Nkawd hla thawj pab zov keeb, thiab tseem mus dhau ib pab ntxiv, nkawd thiaj txog lub qhov rooj hlau uas yuav tawm rau sab nroog nraud. Lub qhov rooj hlau cia li qhib plho rau nkawd. Nkawd tawm plaws mus txog ntawm ib txog kev, ces tus Tshiab cia li ploj ntais lawm.
11 Pob Zeb thiaj tsim dheev, nws hais tias : "Zaum no, kuv paub tseeb tias Huab Tais xa nws tus Tshiab tuaj pab kuv kom kuv dim ntawm Hes Los thiab kom cov Yus Das txhob tau pom raws li lawv vam."
Yog Tswv Ntuj lo Lus
Nkauj Paj Nruag Txais Ntuj Lus
NPN 34:2-3, 4-5, 6-7, 8-9 (5b)
(Nqua Suab Cav Txog Tswv Ntuj, 209)
Txais: Huab Tais tus Tshiab yuav cawm cov neeg hwm Huab Tais.
1. Kuv cav lus zoo txog Huab Tais txhua niaj txhua hnub.
Kuv lub ncauj yuav cav lus zoo txog nws.
Kuv tus ntsuj plig yuav muaj ntsej muag nyob hauv Huab Tais.
Cov neeg me hnov kuv cov lus, lawv yuav zoo siab. Teb.
2. Nej nrog kuv cav txog Huab Tais,
peb sawv daws ua ke tshaj nws lub npe.
Kuv nrhiav Huab Tais, nws teb kuv.
Nws pab kuv dim ntawm txhua yam uas kuv ntshai. Teb.
3. Cov neeg nrhiav Huab Tais,
lawv yuav muaj ntsej muag luag ntxhi nyob hauv kev hom khaj,
lawv yuav tsis poob ntsej muag.
Thaum cov txom nyem hu txog Huab Tais, nws mloog lawv,
nws cawm lawv ntawm kev txhawj xeeb. Teb.
4. Huab Tais tus Tshiab tsa tsev tsam phooj
ncig cov neeg hwm Huab Tais, nws npo lawv.
Nej ntsia thiab nej saj saib Huab Tais lub siab zoo npaum li cas.
Tus tau txoj hmoov zoo yog tus tuaj nkaum nyob hauv Huab Tais. Teb.
Zaj Nyeem Ob
2 Tis Mos Tes 4: 6-8.16b.17-18
Txog lub caij Paj Lug yuav tuag. Nws cev nws txoj sia rau Tswv Ntuj xws li ib co txim txi Ntuj.
Cov lus nyob hauv leej ntshiab Paj Lug tsab ntawv ob sau tuaj rau Tis Mos Tes
6 Tus zoo nyiam, ntawm kuv, mas txog lub caij hliv kuv roj ntsha los txi Ntuj lawm. Txog lub caij kuv yuav mus.
7 Tas kuv sid, kuv tau ua ib ntsug zoo rog. Kuv khiav mus txog chaw lawm. Kuv tau ceev txoj kev ntseeg.
8 Nyem no, Huab Tais twb npaj tau lub kaus mom yeej phim cov neeg ncaj rau kuv lawm. Lub zim txwv kawg, tus Huab Tais txiav txim ncaj yuav muab lub kaus mom ntawd rau kuv. Tsis yog yuav muab rau kuv ib leeg xwb : nws yuav muab rau tas tsoom neeg nyiam nws, thiab rau tas tsoom neeg tos lub Hnub Nyoog nws yuav tawm los rau pom xyeem.
16b Sawv daws tso kuv pov tseg.
17 Huab Tais tau nrog nraim kuv. Nws tso nws lub zog rau hauv kuv, kom kuv tshaj lub Moo, kom lub Moo nrov mus txog cov neeg teev pej kum dab pob ntseg. Ntuj npo kuv dim ntawm tsov ntxhuav lub ncauj.
18 Huab Tais yuav npo kuv dim ntawm txhua hom kev nkhaus. Huab Tais yuav cawm kuv. Nws yuav txuag kuv rau nws lub Ceeb Tsheej nyob saum Ntuj. Huab Tais nto koob meej mus ib txhiab ib txhis. Ua li.
Yog Tswv Ntuj lo Lus
Nkauj Cav Txog Lub Moo Zoo
Mas Tais 16:18
(Nqua Suab Cav Txog Tswv Ntuj, 237, nqe 6)
As les lus yas. As les lus yas. Koj yog lub pob zeb, Kuv yuav tsa Kuv lub Koom Txoos nyob rau saum lub pob zeb no. Dab phem cov qhov rooj yuav tiv tsis tau lub pob zeb no. As les lus yas.
Ntawv Moo Zoo
Mas Tais 16:13-19
Yes Xus xav vam txog neeg kom lawv nrog nws ua cov hauj lwm cawm lub ntiaj teb neeg. Yes Xus tsa ib tug neeg ua tus pab tsoom ntseeg kom sib haum xeeb.
Nej mloog ib zag nyob hauv leej ntshiab Mas Tais ntawv Moo Zoo
13 Tseem muaj ib hnub, Yes Xus tuaj txog cheeb tsam ntawm Xes Ntxas Les Fis Lis Pos, ces nws nug cov thwj tim li no : "Luag tej hais tias Neeg Leej Tub yog leej twg ?"
14 Lawv teb tias : Ib txhia hais tias : Yog Zam Ntxuav Plig. Ib txhia hais tias, yog Es Lias. Tseem muaj lwm cov hais tias yog Yes Les Mias los yog ib tug hauv cov yaj saub. Yes Xus hais tias :
15 "Nej ne, nej hais tias kuv yog leej twg ?"
16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub."
17 Yes Xus teb rau Pob Zeb tias : "Xis Moos, Yos Nas tus tub, koj txoj hmoov zoo, vim qhov koj paub no, tsis yog nqaij thiab ntshav qhia koj. Yog kuv Txiv nyob saum ntuj qhia koj.
18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis taus lub pob zeb no.
19 Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."
Yog Huab Tais Yes Xus Lub Moo Zoo
){kind=link}