14.9 Hwm Yes Xus Tus ntoo cuam ntshiab (Lễ Suy Tôn Thánh Giá)

Zaj Nyeem Ib
Xam Phaj 21: 4b-9
Leej twg raug nab tom, yog nws ntsia tus nab nchuav ntawd ces nws yuav tsis tuag.
Cov lus nyob hauv Ntawv Xam Phaj
^4b Nyob teb chaws suab puam, thaum lawv mus txog ib tog kev, tsoom pej xeem npau taws.
⁵ Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm !"
⁶ Tswv Ntuj thiaj tso ib cov nab muaj taug tuaj tom lawv. Cov nab ntawd tom cov His Xas Lais tuag coob leej.
⁷ Tsoom pej xeem mus hais rau Mais Xes tias : "Peb ua txhaum lawm vim peb tau cem Huab Tais thiab cem koj. Koj thov kom Huab Tais zam rau peb, kom nws ntiab cov niag nab ntawd khiav mus deb peb." Ces Mais Xes thiaj thov kom Ntuj zam rau lawv.
⁸ Huab Tais teb tias : "Koj nchuav ib tug nab muaj taug, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag."
⁹ Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.
Yog Tswv Ntuj lo Lus

Txais Ntuj Lus
NPN 78:1-2, 34-35, 36-37, 38, (7b)
(Nqua Suab Cav Txog Tswv Ntuj, 212)

Txais : Nej yuav nco ntsoov Tswv Ntuj cov hauj lwm loj.

1. Kuv haiv neeg, nej mloog kuv txoj cai lij choj mas !
Nej tig ntsej los mloog cov lus tawm ntawm kuv lub ncauj los !
Kuv yuav qhib ncauj hais ib zaj paj lug,
txhais tej zaj lus qhuab qhia hais txog lub caij thaud. Teb.

2. Thaum Tswv Ntuj tua lawv ces lawv nrhiav nws.
Lawv hloov siab tshiab, lawv tig los rau nws.
Lawv rov nco tias Tswv Ntuj yog lawv lub tsua,
nco tias tus Tswv Ntuj nyob siab tshaj yog tus txhiv lawv. Teb.

3. Lawv lub ncauj lam ntxias nws xwb,
lawv tus nplaig dag nws.
Lawv lub siab tsis npuab nws ruaj.
Lawv tsis tso siab rau cov lus nws cog rau lawv. Teb.

4. Tswv Ntuj lub siab hlub mos nyoos zam rau lawv.
Nws tsis rhuav lawv, nws ntxuav lawv cov txhaum.
Nws cheem nws lub siab npau tsis tseg.
Nws tsis pub nws lub siab ceev tsim nruab dab ntub los. Teb.

Zaj Nyeem Ob
Fis Lis Pos 2,6-11
Yes Xus txo nws qis, vim li ntawd, Tswv Ntuj thiaj tsa Nws ua ib tug loj nyob siab siab.
Cov lus nyob hauv leej ntshiab Paj Lug tsab ntawv sau tuaj rau cov ntseeg nyob Fis Lis Pos.
⁶ Yes Xus Pleev yog Tswv Ntuj, tiam sis nws tsis cia nws lub hwj chim Tswv Ntuj rau luag hawm : nws muab nws lub hwj chim hle.
⁷ Nws yeem ua ib tug qhev, nws yug los ua neeg xws li ib tsoom neeg. Luag pom nws tus yam ntxwv yog yam ntxwv tib neeg.
⁸ Nws txo nws qis : nws tuaj yeem mloog Ntuj lus mus txog qhov tuag, thiab tseem xaiv txoj kev tuag saum ntoo cuam.
⁹ Vim li ntawd, mas Tswv Ntuj thiaj tsa Yes Xus ua ib tug loj nyob siab siab. Tswv Ntuj muab lub npe uas nyob siab dua lwm cov npe rau nws.
¹⁰ Li ntawd, tus twg hnov tuav txog Yes Xus lub npe, tsis hais nyob saum cov txheej ntuj, los nyob ntiaj teb no, los nyob nruab yeeb, mas tus ntawd cia li txhos caug hawm.
¹¹ Txhua xeem lus yuav tsum cav tias Yes Xus Pleev yog Huab Tais : Leej Txiv Tswv Ntuj thiaj muaj koob meej nto moo lug.
Yog Tswv Ntuj lo Lus

Nkauj Cav Txog Lub Moo Zoo
(Nqua Suab Cav Txog Tswv Ntuj, 226, nqe 3)
As les lus yas. As les lus yas. Peb tus Vaj Pleev, peb tuaj hawm Koj. Peb zoo siab hlo tuaj cav txog Koj vim Koj tuag saum tus ntoo cuam kom tau txhiv ntiaj teb neeg. As les lus yas.

Ntawv Moo Zoo
Zam 3:13-17
Neeg Leej Tub yuav tsum raug luag tsa.
Nej mloog ib zag nyob hauv leej ntshiab Zam Ntawv Moo Zoo
¹³ Muaj ib zaug, Yes Xus hais rau Nis Kos Des Mos tias : tsis muaj leej twg tau nce mus saum ntuj, tsuas yog tus nqes saum ntuj los, uas yog Neeg Leej Tub nyob saum ntuj.
¹⁴ Neeg Leej Tub yuav tsum raug luag tsa nws siab xws li Mais Xes tsa tus nab nyob teb chaws suab puam,
¹⁵ kom xwv tus ntseeg txog nws, muaj txoj sia nyob mus li.
¹⁶ Vim Tswv Ntuj nyiam lub qab ntuj neeg npaum no : nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.
¹⁷ Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg, nws xa Leej Tub tuaj cawm lub qab ntuj neeg.
Yog Huab Tais Yes Xus Lub Moo Zoo