Zaj Nyeem Ib
Es Xes Kias 47: 1-2.8-9.12
Cov Lus nyob hauv ntawv Es Xes Kias
1 Thaum ntawd, Tus neeg ntawd coj kuv rov los txog ntawm lub qhov rooj mus hauv lub Tuam Tsev Teev Ntuj. Ua ciav muaj ib tug dej ntws hauv taw rooj los dua sab hnub tuaj lawm, vim lub Tuam Tsev tig mus rau sab hnub tuaj lawm. Dej txhawv ntawm sab qab tsuas lub Tuam Tsev Teev Ntuj sab xis nram lub qab thaj txi Ntuj.
2 Tus neeg coj kuv tawm ntawm lub qhov rooj nyob sab pej los, nws coj kuv ncig sab Tuam Tsev nraud los txog ntawm lub rooj vag uas tig rau sab hnub tuaj. Nyob ntawd, dej ntws ntawm sab xis los.
8 Tus neeg ntawd hais rau kuv tias : "Cov dej no ntws mus rau toob fab mus nram lub hav As Las Npas, yuav mus tshwm rau hauv lub hiav txwv. Cov dej no mus ua kom lub hiav txwv cov dej huv tuaj.
9 Tus dej no ntws txog qhov twg mas tas puas tsav yam muaj txoj sia mus mus los los yuav ciaj nyob hauv cov dej no. Yuav muaj ntses ntau heev vim tus dej no ntws mus txog qhov twg mas yam twg yuav huv tuaj thiab txoj sia hlob taus.
12 Nyob ntawm ob sab ntug dej yuav tuaj tas puas tsav yam txiv ntoo, lawv cov nplooj yuav tsis zeeg ib zaug thiab lawv yuav txi txiv mus li. Niaj hli lawv yuav txi ib co txiv tshiab, vim cov dej ntws ntawm thaj chaw ntshiab los. Cov txiv yuav yog ib co txhiam xws, cov nplooj yuav yog ib co tshuaj."
Yog Tswv Ntuj lo Lus
Nkauj Paj Nruag Txais Ntuj Lus
NPN 46:2-3, 5-6, 8-9 (5)
Txais: Cov dej uas ntws hauv tus kwj deg, ua chaw zoo siab rau Tswv Ntuj lub tsheej, uas yog tus Nyob Siab lub tuam tsev ntshiab.
1. Tswv Ntuj yog peb lub chaws nkaum thiab yog peb lub zog.
Thaum peb txhawj xeeb, nws pab peb.
Tab yog lub ntiaj teb ua zog koog,
toj roob hauv pes nphau rau hauv tiv txwv los peb tsis ntshai. Teb.
2. Muaj ib tug dej ntws ncau ntau ceg
ua chaw zoo siab rau Tswv Ntuj lub tsheej.
Lub tsheej ntawd yog tus Nyob Siab lub tuam tsev ntshiab.
Tswv Ntuj nyob nruab nrab lub tsheej, lub tsheej yuav tsis tshee tsis co.
Kaj ntug txoog, Tswv Ntuj pab nws. Teb.
3. Tus Huab Tais muaj hwj huam tas nrho nrog peb nyob.
Yas Kos tus Tswv Ntuj yog peb lub yeej ntsa zeb.
Nej mus xyuas Huab Tais cov hauj lwm,
nws ua tej yam loj tas nrho rau lub ntiaj teb. Teb.
Zaj Nyeem Ob
1 Kos Lis Nthos 3: 9b-11.16-17
Zaj nyeem nyob hauv leej ntshiab Paj Lug thawj tsab ntawv rau cov ntseeg nyob Kos Lis Nthos.
9c Kwv tij sawv daws, nej yog Tswv Ntuj lub Tuam Tsev.
10 Kuv ua raws li lub txiaj ntsim uas Tswv Ntuj pub rau kuv. Kuv zoo li tus neeg txhim tsev : kuv pib txhim taw ntsa. Lwm tus tau txhim ntxiv rau saud. Tab sis nyias yuav muab siab rau saib nyias txoj kev txhim tsev.
11 Vim tias tsis muaj leej twg yuav txhim ib tug taw ntsa txawv tus uas ib txwm nyob : tus taw ntsa ntawd yog Yes Xus Pleev.
16 Nej puas paub tias nej yog Tswv Ntuj ib lub Tuam Tsev ? Nej puas paub tias Tswv Ntuj Leej Ntuj Plig nyob txawm hauv nej ?
17 Yog muaj ib tug rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev yog ib yam ntshiab. Lub Tuam Tsev ntawd yog nej.
Yog Tswv Ntuj lo Lus
Nkauj Cav Txog Lub Moo Zoo
2 Xwm 7: 16
As les lus yas. As les lus yas. Huab Tais hais tias : “Kuv tau xaiv thiab foom hmoov zoo rau lub tsev no kom xwv Kuv lub npe yuav nyob ntawd mus tas ib txhiab ib txhis.” As les lus yas.
Ntawv Moo Zoo
Zam 2: 13-22
Nej mloog ib zag nyob hauv leej ntshiab Zam Ntawv Moo Zoo
13 Yuav txog cov Yus Das lub Ntees Hla, ces Yes Xus mus pem Yes Lus Xas Les.
14 Nyob hauv lub Tuam Tsev Teev Ntuj, Yes Xus pom cov tub luam muag nyuj, muag tshis, muag nquab, thiab cov neeg pauv nyiaj zaum ntawm lawv cov rooj.
15 Nws muab ib co hlua ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj, nws caum cov yaj thiab cov nyuj. Nws nchuav cov pauv nyiaj tej nyiaj, nws ntxeev lawv tej rooj.
16 Nws hais rau cov muag nquab tias : "Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev ua luam ntxiv."
17 Yes Xus cov thwj tim nco txog lo lus uas Ntawv sau tseg tias : Kev mob siab rau koj lub Tsev ua kuv lub siab kub lug.
18 Cov Yus Das thiaj qhib ncauj hais rau nws tias : "Koj tau ua li no, koj yuav muab lub cim dab tsi rau peb pom ?
19 Yes Xus teb rau lawv, nws hais tias : "Nej rhuav lub Tsev Ntshiab no. Peb hnub tom qab, mas kuv rov txhim tau.”
20 Cov Yus Das thiaj hais tias : "Lawv ua hauj lwm plaub caug rau xyoo thiaj txhim tau lub Tsev Ntshiab no. Hos koj, koj ua peb hnub, koj yuav rov txhim tau !"
21 Tab sis Yes Xus hais txog nws lub Cev uas yog lub Tsev Ntshiab.
22 Thaum Yes Xus sawv hauv cov tuag rov los lawm, nws cov thwj tim rov nco tias nws twb tau hais li ntawd, ces lawv ntseeg txog Phau Ntawv thiab ntseeg txog lo lus uas Yes Xus tau hais.
Yog Huab Tais Yes Xus Lub Moo Zoo
){kind=link}